Túrkııanyń Ystanbul qalasynda ótip jatqan áıelder arasyndaǵy álem chempıonatynyń besinshi kúni tórt boksshymyz rıngke kóterildi. Olar – Jaına Shekerbekova, Karına Ibragımova, Aıda Ábikeeva jáne Nadejda Rıabes. Sondaı-aq Halyqaralyq boks qaýymdastyǵynyń (IBA) týy astynda Angelına Lýkas óner kórsetti.
Kúndizgi baǵdarlamada úsh qyzymyz jarys kórigin qyzdyryp, ekeýi jeńiske jetti. Atap aıtsaq, Jaına Shekerbekova (52 kılo) Pýrto-Rıkonyń ókili Melodı Vargastyń tas-talqanyn shyǵardy. Karına Ibragımova (57 kılo) rýmynııalyq Klaýdııa Nechıtaǵa bas kótertken joq. Bul básekeniń ekeýinde de 5:0 esebi tirkeldi. Al Aıda Ábikeevanyń aljırlik Imane Helıfke áli jetpedi.
Keshki baǵdarlamada Nadejda Rıabes túrkııalyq Býsra Ishıldarmen kúsh synasty. Byltyr Tokıo Olımpıadasynda Qazaqstannyń namysyn tek Rıabes qorǵaǵan edi. О́zgeleri irikteý synynan óte almaǵan. Sol sebepti tájirıbesi mol sportshyǵa mol senim artylyp edi. Alaıda Nadejda úkilegen úmitimizdi aqtaı almaı, Ishıldarǵa ese jiberdi.
Qazaqstan chempıonatyna qatysýdan bas tartyp, IBA-nyń týy astynda óner kórsetýdi qup kórgen Angelına Lýkas tusaýkeser kezdesýinde ońbaı súrindi. Karolın De Almeıdemen bolǵan jekpe-jekten soń bes tóreshiniń barlyǵy da brazılııalyq boksshynyń myqtylyǵyn moıyndady.
Esterińizge sala keteıik, osy kúnge deıin eki boksshymyz sharshy alańǵa shyǵyp, ekeýi de jeńiske jetken edi. Valentına Halzova (70 kılo) kenııalyq Lorna Kýsa Sımbıdi birinshi raýndta-aq sulatyp salsa, Alýa Balqybekova (48 kılo) kanadalyq Prııankı Dılonǵa bas kótertpegen bolatyn.