Taılandtyń bas shahary – Bangkokta kógaldaǵy hokkeıden erler arasyndaǵy HIH jazǵy Azııa oıyndarynyń irikteý týrnıri aıaqtaldy. Atalǵan jarysta toǵyz komanda kúsh synasty. О́kinishke qaraı, jerlesterimiz Taı elinde tym súreńsiz óner kórsetip, óz jankúıerlerin jerge qaratty. Alǵashqy aınalymdarda alań ıeleri men Omanǵa ese jibergen olar úshinshi týrda О́zbekstanmen teń oınady. Odan keıin Gonkongtan utyldy. Sońǵy matchtaǵy sátsizdik Qazaqstan quramasyn Azıadada óner kórsetý múmkindiginen aıyrdy.
Iá, joǵarydaǵy jaǵdaı jankúıerlerdiń kóńiline selkeý túsirgeni ras. О́ıtkeni kezinde kógaldaǵy hokkeı Qazaqstanda keremet qarqynmen damyǵanyn kóziqaraqty oqyrmandar jaqsy biledi. Jer sharynyń altydan bir bóligin baýyryna basqan Keńes Odaǵynda Almatynyń «Dınamosyna» teń keler komanda joq edi. Naqty derekterge súıensek, 1970-1991 jyldar aralyǵynda KSRO chempıonatynyń jalaýy 22 márte jelbirese, jerlesterimiz sol jarystardyń 18-inde jeńimpaz atandy. Tek 1970, 1971, 1974 jyldary Ýlıanovskiniń «Volgasy» men 1980 jyly Sverdlovskiniń SKA-syna jol berip, kúmis medaldy qanaǵat tutty. Odaq kýbogyn bes ret tóbesine kóterdi. Eýropa chempıondary kýbogyn eki márte oljalap, taǵy bir ret qola júldeni qorjynǵa saldy.
Al Eýropa chempıondary kýbogynyń tusaýy 1974 jyly Nıderlandtyń Ýtreh qalasynda kesilgen eken. 1991 jylǵa deıin bul týrnırdiń shymyldyǵy 18 márte túrildi. KSRO-nyń ókilderi arasynan tek «Dınamonyń» ǵana dúbirli dodada dara shyǵýǵa kúsh-jigeri jetti. 1982 jyly Fransııanyń Versali men 1983 jyly Nıderlandtyń Gaagasynda almatylyqtar aldaryna jan salmady. Sondaı-aq top jarǵandar qatarynda Germanııa (7 ret), Anglııa men Nıderlandtyń (4 retten) jáne Ispanııanyń (1 ret) klýbtary bar. 1985 jyly Germanııanyń Frankental qalasynda uıymdastyrylǵan jarysta «Dınamonyń» oıynshylary qola medaldy moıyndaryna ildi.
Sportsúıer qaýym ataǵy alysqa jaıylǵan «Dınamonyń» jarqyn jeńisteriniń barlyǵyn Edýard Aırıhtiń esimimen tyǵyz baılanystyrady. Árıne oǵan eshkim daý aıta almaıdy. 1964 jyly Povoljeden Qazaqstanǵa qonys aýdarǵan ol áýeli respýblıkamyzda dopty hokkeıdiń órkendeýine ólsheýsiz úles qosty. Aırıh pen Qazybek Baıbolovtyń tusynda Almatynyń «Dınamosy» KSRO chempıonatynda 1 altyn, 4 kúmis jáne 4 qolany oljalady. Bir ret Eýropa chempıondary kýbogyn jeńip aldy. Keıinnen Edýard Ferdınandovıch kógaldaǵy hokkeıge túbegeıli bet burdy. Al sporttyń bul túrinen qol jetkizgen tabysymyz jaıynda joǵaryda baıandadyq.
Kógaldaǵy hokkeı Olımpııa oıyndarynyń baǵdarlamasyna sonaý 1908 jyly endi. Sol aralyqta KSRO quramasy bir ret qana júldegerler qataryna qosyldy. 1980 jyly Máskeý Olımpıadasynda Odaqtyń týy astynda óner kórsetken 16 oıynshynyń jeteýi qazaqstandyq klýbtyń órenderi edi. Olar – Mınneýla Ázızov, Sos Aırapetıan, Farıd Zıgangırov, Oleg Zagorodnev, Mıhaıl Nıchıpýrenko, Aleksandr Mıasnıkov jáne Aleksandr Goncharov. Tórt jyldyqtyń basty dodasynda jeńis tuǵyryna kóterilgen sańlaqtardan bólek, Murat Jeksenbekov, Saıan Shaımerdenov, Serik Qalymbaev, Berikqazy Seksenbaev, Birjan Qydyrbekov, Erjan Qumarǵalıev jáne taǵy basqa qandastarymyzdyń jasyndaı jarqyldaǵany kúni keshegideı kóz aldymyzda. Bul dúldúlderdiń barlyǵynyń da esimderi otandyq sport tarıhynda altyn áriptermen jazýly.
Mine, kezinde KSRO men Eýropada qarsylas shaq keltirmeı, óreli ónerimen tórtkúl dúnıege tanylǵan Qazaqstannyń kógaldaǵy hokkeıiniń qazirgi jaı-kúıi osyndaı. Jasyratyny joq, sporttyń bul túri elimizde qalt-kult kúı keship jatqanyna talaı jyldyń júzi boldy. Toqsanynshy jyldardyń ekinshi jartysynda respýblıkalyq federasııanyń prezıdenti Saıan Shaımerdenov osy salanyń eńsesin kóteremin dep kóp ter tókti. Isker basshynyń alǵa qoıǵan maqsaty aıqyn, jospary kóp edi. Alaıda sum ajal abzal azamatty aramyzdan tym erte julyp áketip, Saıan Safýanulynyń bastaǵan isteri aıaqsyz qaldy. Keıingi kezderi Berikqazy Seksenbaev ta kógaldaǵy hokkeıdiń kósegesin kógertý jolynda biraz eńbektendi. Biraq odan da ázirge esh nátıje joq. О́kinishti-aq!