Bokstan áıelder arasyndaǵy Túrkııanyń Ystanbul qalasynda ótip jatqan álem chempıonaty naǵyz qyzǵan shaǵyna jetti. Sońǵy kúnderi taǵy birneshe boksshymyz sharshy alańǵa kóterildi. О́kinishke qaraı, jarys bel ortaǵa jetpeı jatyp, biraz beldi bylǵary qolǵap sheberlerimiz jeńilistiń kermek dámin tatty. Bul jaǵdaı qazaqstandyq jankúıerlerdi qatty qynjyltty.
Beısenbi kúni eki dúrkin álem chempıony degen dardaı ataǵy bar Nazym Qyzaıbaı (50 kılo) asa shıelenisti básekede kolýmbııalyq Ingrıt Valensııaǵa 2:3 esebimen ese jiberdi. Alaıda ol óziniń jeńilgenin moıyndaǵan joq. BAQ ókilderine bergen suhbatynda Qyzaıbaı: «Ystanbulda alǵash ret rıngke kóterilgendikten, bastapqy mınýttarda biraz kibirtiktep qaldym. Onyń ústine qarsylasym da osal emes edi. Ol – Rıo Olımpıadasynyń qola júldegeri. Iá, birinshi raýndta ese jibergenim ras. Biraq odan keıin soqqylarymdy jıi darytyp, basymdyqqa ıe boldym. Ekinshi jáne úshinshi raýnd meniń paıdama sheshildi dep oılaımyn. Soǵan qaramastan tóreshiler Kolýmbııa boksshysynyń qolyn kóterdi», dedi.
Rıo Olımpıadasynyń qola júldegeri, Azııanyń eki dúrkin chempıony Darıǵa Shákimovaǵa (66 kılo) erekshe senim artqan edik. Alaıda ataqty boksshymyz Túrkııa tórinde el úmitin aqtaı almady. Darıǵa esimi kópshilikke beımálim О́zbekstannyń ókili Navbahor Hamıdovaǵa ese jiberdi. Rımma Volosenko da (60 kılo) jeńilistiń kermek dámin tatty. Ol aǵylshyn Shona Vıtvelden aılasyn asyra almady. Sol keshte jerlesterimizdiń arasynan tek Dına Jolamannyń (54 kılo) joly boldy. 2016 jyly álem chempıony atanǵan qandasymyz ıspanııalyq Marııa Madýeno Kondeni qapy qaldyrdy.
Juma kúni koreıalyq Sýdjın Seondy san soqtyrǵan Valentına Halzova (70 kılo) qazaqstandyqtar arasynan alǵashqy bolyp shırek fınalǵa shyqty. Kóp keshikpeı Gúlsaıa Erjan da (81 kılo) sol mejeden kórinip, óz kórermenderin qýantty. Qandasymyz ýkraınalyq Olesıa Krysıýkqa bas kótertken joq. Álem men Azııa chempıony jáne de sol jarystarda san márte júldegerler sanatynan kóringen Lázzat Kúngeıbaeva (+81 kılo) túrkııalyq Sennýr Demırdiń osal tusyn taba almady.
Senbi bizder úshin sátti boldy. Alýa Balqybekova (48 kılo) serbııalyq Snejana Sılkovıchti san soqtyrsa, Karına Ibragımova (57 kılo) Djennıfer Romerodan basym tústi. Bul jekpe-jekterde qazaqstandyq boksshylardyń ústemdigi esh kúmán týǵyzǵan joq.