Senbide Irannyń bas shahary – Tegeranda voleıboldan erler arasyndaǵy Azııanyń klýbtyq chempıonaty bastaldy. Bul jarys 12 myń kórermenge eseptelgen «Azadı» sport kesheninde ótýde. Sary qurlyqtyń eń úzdik alty komandasy bas qosqan básekede Qazaqstannyń «Taraz» klýby da óner kórsetýde.
Atalǵan jarys buryn AVC kýbogy dep atalatyn. Oǵan Azııadan bólek, Aýstralııa men Muhıt jaǵalaýynda ornalasqan memleketterdiń ókilderi de qatysatyn. Áli esimizde, 1993 jyly Taılandtyń Nakhonratchasıma qalasynda jalaýy jelbiregen jarysta Almatynyń «Azamaty» tabysty óner kórsetip, kúmis medal ıelendi. Jartylaı fınalda Japonııanyń jigitterin jeńgen jerlestermiz aqtyq saıysta Ońtústik Koreıanyń órenderine ese jiberdi. Juldyzdy komandanyń sapynda Baqytjan Baıtóreevtiń jasyndaı jarqyldaǵany da kúni keshegideı kóz aldymyzda. Dál sol jyly qazaqtyń uly Azııanyń eń úzdik oıynshysy atanǵan edi. Tarıhqa júginsek, Baqytjanǵa deıin de, Baqytjannan keıin de mundaı ataq Qazaqstannyń birde-bir voleıbolshysyna buıyrǵan emes.
1999 jyldan beri Azııanyń klýbtyq chempıonaty derbes resmı jarys retinde óte bastady. Sol kezden beri 22 márte uıymdastyrylǵan dúbirli dodada Irannyń voleıbolshylary eń úlken nátıjege qol jetkizdi. Parsy eliniń ókilderi 15 ret bas júldeni oljalady. Ońtústik Koreıa oǵlandary eki ret ozsa, Qytaı, Qazaqstan, Qatar jáne Taıpeıden kelgen komandalar bir-bir retten top jardy. О́zge memlekettiń órenderine ondaı baq buıyrmady. Al jekelegen klýbtar jaıynda aıtar bolsaq, sary qurlyqta Tegerannyń «Paıkanyna» teń keler eshkim joq. Olar jeti jarysta jeńimpaz atandy. Tedjonnyń «Samsýng Inshýrensy» men Tegerannyń «Sarmaıe Benksi» eki retten dara shyqty.
Qazaqstandyq komandalardyń jalǵyz bas júldesi «Rahattyń» enshisinde. 2005 jyly Pákistannyń Islamabad qalasynda uıymdastyrylǵan jarysta almatylyqtar aldaryna jan salmady. Fınalda olar Tegerannyń «Saıpasyn» san soqtyrdy. Otandastarymyz taǵy tórt ret aqtyq synda óner kórsetti. 2006 jyly «Rahat», 2008 ben 2011 jyldary «Almaty» jáne 2018 jyly «Atyraý» sheshýshi tusta ırandyqtardan utylyp, kúmis medal ıelendi. Sondaı-aq 2002 jáne 2004 jyldary «Atyraý» men 2021 jyly Almatynyń «Býrevestnıgi» qola júldeni qorjynǵa saldy.
Byltyr Taılandtyń Nakhonratchasımasynda «Býrevestnık» qola medal ıelengenin joǵaryda aıttyq. Bul týrnırdiń bas júldesi Irannyń «Fýlad Sırdjanyna» buıyrdy. Fınalda olar Qatardyń «Ál-Arabıinen» basym tústi. Biraq «sary qurlyqtyń basty jarysynda qola aldyq» dep keýde qaǵyp, arqany keńge salýǵa bolmaıdy. О́ıtkeni pandemııaǵa baılanysty Japonııa men Qytaıdyń eń myqty ujymdary atalǵan dodaǵa qatyspaǵanyn eskergen jón. Olardan bólek, Aýstralııa, Vetnam, Taıpeı, Úndistan jáne Gonkongtyń da ókilderi Taı elinde boı kórsetken joq.
Sońǵy jyldary áıelder arasyndaǵy Azııanyń klýbtyq chempıonatynda Qazaqstannnyń voleıbolshylary ústemdik quryp júr. Byltyr Taılandta О́skemenniń «Altaıy» altynnan alqa taqsa, bıyl Semeıde Petropavldyń «Qýanyshy» qarsylas shaq keltirmedi. Endi biz burymdylardyń jeńisti jolyn bóriktiler jalǵastyrsa dep tileımiz. Tegerandaǵy tartysta «Taraz» da jeńis tuǵyryna kóterilse, nur ústine nur bolar edi...
Senbide «Taraz» Qatardyń «Ál-Raıanymen» kúsh synasty. Keshe Iraktyń «Erbılimen» sheberlik baıqasty. Búgin Irannyń «M.Shahbad Iezdimen» saıysqa túsemiz. Kelesi topta Japonııanyń «Osaka», Taılandtyń «Nakhonratchasıma», Iraktyń «Soýt Gas Klab» jáne Irannyń «Paıkan» klýbtary óner kórsetýde. Jarystyń jeńimpazy men júldegerleri 20 mamyrda anyqtalady. Azııanyń eń úzdik ujymy bıyl kúzde shymyldyǵy túriletin álemniń klýbtyq chempıonatyna qatysady.