Májilistiń jalpy otyrysynda 2021 jylǵy respýblıkalyq bıýdjettiń atqarylýy týraly esepti qaraý kezinde QR Premer-Mınıstriniń orynbasary – Qarjy mınıstri Erulan Jamaýbaev ótken jylǵy áleýmettik shyǵystar 910 mlrd teńgege ulǵaıǵanyn habarlady, dep jazady Egemen.kz.
«2021 jyly respýblıkalyq bıýdjettiń atqarylýy koronavırýs pandemııasynyń teris áserleri jaǵdaıynda júzege asyryldy. Dese de 2020 jylmen salystyrǵanda iskerlik belsendiliktiń jandanýy baıqaldy. Jalpy ishki ónimniń ósimi 4%-dy qurady. Ekonomıkanyń barlyq negizgi salalarynda oń nátıjege qol jetkizildi. Máselen, ónerkásip óndiris kólemi 3,8%-ǵa, qurylys 7,6%-ǵa, kólik jáne saýda salalary tıisinshe 3,6%-ǵa jáne 9,2%-ǵa ósti. Jahandyq pandemııadan keıin qalyptasqan suranysty jáne óndirister men logıstıkalyq tizbekterdiń buzylýyn qalpyna keltirý aıasynda taýarlar men kórsetiletin qyzmetterge baǵanyń jappaı ósýi baıqaldy», dedi Erulan Jamaýbaev.
Ol ótken jyldyń qorytyndysy boıynsha ınflıasııa deńgeıi 8,4%-dy quraǵanyn eske saldy.
«Negizgi kapıtalǵa salynǵan ınvestısııalar kólemi 3,5%-ǵa ulǵaıdy. Jumyssyzdyq 4,9% deńgeıinde saqtaldy», dedi mınıstr.
Qarjy mınıstri Respýblıkalyq bıýdjettiń atqarylýy kórsetkishterine de toqtala ketti.
«Túsimder 100,8%-ǵa atqarylyp, 12,7 trln teńgeni qurady. Shyǵystar 99,2%-ǵa ıgerilip, 15,2 trln teńgeni qurady. Áleýmettik shyǵystar 2020 jylmen salystyrǵanda 910 mlrd teńgege ulǵaıyp, 7,5 trln teńgeni qurady. Bul respýblıkalyq bıýdjettiń jalpy kóleminiń 50 paıyzyn qamtydy», dedi ol.