Qazaqstanda eki reseılik tehnıkalyq joǵary oqý oryndarynyń fılıaly ashylady. Oqý oryndaryn qurý týraly Bilim jáne ǵylym mınıstrliginiń buıryǵy «Ashyq NQA» saıtynda jarııalandy, dep habarlaıdy Egemen.kz.
«MIFI Ulttyq ıadrolyq zertteý ýnıversıtetiniń fılıaly ál-Farabı atyndaǵy Qazaq ulttyq ýnıversıtetiniń bazasynda, al I.M. Gýbkın atyndaǵy Reseı memlekettik munaı jáne gaz ýnıversıtetiniń fılıaly S. О́tebaev atyndaǵy Atyraý munaı jáne gaz ýnıversıtetiniń bazasynda qurylady», delingen qujatta .
Fılıaldardyń bilim berý baǵdarlamasyna qazaq tili men Qazaqstan tarıhy pánderi engiziledi. Buıryqqa sáıkes, oqý merzimi Qazaqstandaǵy fılıaldarda 2 nemese 3 jyl, al Reseıdegi bas ýnıversıtet bazasynda 1 nemese 2 jylǵa josparlanǵan.
«Bilim berý prosesi bas joǵary oqý oryndarynyń professorlyq-oqytýshylyq quramyn tarta otyryp uıymdastyrylady. Olardyń árbir fılıaldaǵy úlesi keminde 50% bolmaq. Fılıaldar memlekettik bilim berý tapsyrysy sheńberindegi qarajat, ǵylymı jobalardy qoldaý, ınvestısııalar jáne tyıym salynbaǵan ózge de kózder esebinen qarjylandyrylady», dep jazylǵan buıryqta.
Fılıaldar óz qarajaty nemese ózge de qoldaý kózderi esebinen stýdentterge grant, stıpendııa men basqa da tólemder jasaıdy.