Elimizdegi At týrızmin dáriptep júrgen shabandozdar Aqmola jáne Soltústik Qazaqstan oblystarynyń kıeli jerlerine saıahatqa shyqty. Jeti kúndik ekspedısııanyń maqsaty – Bozoq qalashyǵy men Botaı mádenıeti sekildi ulttyq mańyzy bar eskertkishterdi jurtshylyqqa keńirek nasıhattaý. Sondaı-aq Qazaqstandaǵy ekologııalyq týrızmdi odan ári damytýdy da kózdegen.
Mazmundy is-sharaǵa Mádenıet jáne sport mınıstri Dáýren Abaev, ǵalymdar, At-travel klýbynyń ókilderi men qoǵam belsendileri qatysyp, ekspedısııa múshelerine sát-sapar tiledi.
– Osy dalada adamzat alǵash ret jylqyny qolǵa úıretti. Botaı mádenıeti – sol uly órkenıettiń bastaýy. Bozoq qalashyǵy – eńseli elordamyzdyń altyn tamyry. Bul jerde ulttyq park qurý arqyly biz kóne tarıhymyzdy jas urpaqqa nasıhattaımyz. Mádenıet jáne sport mınıstrligi ashyq aspan astyndaǵy ulttyq mýzeı qurylysyn kezeń-kezeńmen júzege asyrýdy kózdeıdi. Aldaǵy ýaqytta da «Bozoq» mýzeı-qoryǵynyń jumysy jandana beredi. Soltústik Qazaqstan men Aqmola oblystarynyń arasyn atpen júrip ótetin ekspedısııanyń máni erekshe. Osyndaı is-sharalar arqyly atqa minýdi nasıhattaımyz, tarıhymyzben tanysamyz, eko-týrızmdi damytamyz. Ekspedısııany uıymdastyrýǵa úles qosqan barshańyzǵa alǵys aıtamyn, – dedi Dáýren Abaev.
Aıta keteıik, Bozoq – astana irgesinde ornalasqan 1250 jyldyq tarıhy bar kóne qalashyq bolsa, Botaı – ertedegi Eýrazııa jylqy ósirýshileriniń biregeı qonysy. Bul mádenıet bizdiń zamanymyzǵa deıingi V-IV ǵasyrlarda dáýirledi. Onda júrgizilgen zertteýlerdiń tarıhı mańyzy – jylqylardy qolǵa úıretýdiń álemdegi birden bir ortalyǵy Qazaqstan ekenin dáleldeıdi.