Elimizdegi eń úlken haıýanattar baǵy úshin ótken jyl tabysty boldy. Byltyr zoobaqta 31 janýardan 87 tól alynǵan. Sondaı-aq zoobaq kolleksııasy bızon, tamandýa, sıveta, geneta, agama sııaqty sırek kezdesetin janýarlarmen tolyǵyp otyr.
Almaty haıýanattar baǵy – Qazaqstandaǵy eń kóne jáne bedeldi zoobaqtardyń biri. Aýmaǵy 21 gektardy qamtıtyn demalys ornyn 385 túrge jatatyn 4 myńnan astam janýar, qus jáne baýyrymen jorǵalaýshy mekendeıdi. Olardyń 76 túri Halyqaralyq tabıǵatty qorǵaý odaǵynyń qaýipsizdik tizimine, al 24 túri Qazaqstannyń Qyzyl kitabyna engizilgen.
«О́tken jyly zoobaqqa kelýshiler sany 1,2 mıllıon adamǵa jetti. Bul bizdiń zoobaqtyń eldegi jáne aımaqtaǵy tanymaldyǵyn aıqyn kórsetedi. Jyl saıyn kelýshiler sanynyń artýy – bizdiń jumysymyzdyń jáne tabıǵatty qorǵaý mıssııamyzdyń kórinisi», deıdi Almaty qalalyq Mádenıet basqarmasynyń basshysy Danııar Álıev.
Byltyr Almaty haıýanattar baǵy Eýropalyq zoobaqtar men akvarıýmdar qaýymdastyǵynyń tolyqqandy múshesi atanǵan. Bul mártebe zoobaqtyń halyqaralyq standarttarǵa saı ekenin, janýarlardy qorǵaý jáne ǵylymı zertteýlerde jańa múmkindikterge qol jetkizetinin rastaıdy.
Danııar Álıevtiń aıtýynsha, baq bıyl aýqymdy rekonstrýksııadan ótedi. Jobanyń maqsaty – kelýshilerge jaıly aýan syılaý hám demalys ornyn tanymdyq turǵydan jańa deńgeıge kóterý. Joba oıdaǵydaı aıaqtalar bolsa, zoobaqqa jylyna 2 mıllıon adam keledi dep josparlanǵan.
Sheteldik týrıster Almaty haıýanattar baǵyn – janýarlar álemine jeteleıtin tanymdyq alań ǵana emes, balalar men eresekterge bilim men áser syılaıtyn erekshe oryn dep baǵalaǵan. Jańa kezeńde zoobaq Almatynyń ǵana emes, búkil Ortalyq Azııanyń eń iri zamanaýı ortalyǵyna aınalmaq.
ALMATY