Búgingi Úkimet otyrysynda QR Premer-Mınıstri Álıhan Smaıylov memlekettik organdardyń birinshi basshylary men ákimderge ınflıasııany tejeý jumysyn kúsheıtýdi tapsyrdy, dep habarlaıdy Egemen.kz.
«5 aıdyń qorytyndysy boıynsha jalpy ishki ónim 4,6%-ǵa ósti. Oǵan negizinen naqty sektordyń qarqyndy damýy, onyń ishinde óńdeý ónerkásibi aıtarlyqtaı úles qosty. О́sim tirkelgen negizgi salalar – azyq-túlik ónimderi - 3, sýsyn óndirisi - 18, jeńil ónerkásip - 8, hımııa ónerkásibi - 11, rezına jáne plastmassa buıymdaryn shyǵarý - 11%-dan asty. Sondaı-aq munaı óńdeý - 8, jıhaz jáne mashına jasaý ónimderi - 10, farmasevtıka - 5%-ǵa ósti», dedi Úkimet basshysy.
Onyń aıtýynsha, taý-ken ónerkásibindegi 4% ósim tabıǵı gaz, munaı, kómir jáne metall kenin óndirý esebinen qamtamasyz etildi. Qurylys salasy 9%-ǵa jýyq turaqty ósim kórsetip otyr. Qurylys materıaldarynyń óndirisi 5%-ǵa artty. Qyzmet kórsetý sektorynda saýda - 11, kólik salasy - 8 jáne baılanys - 7%-dan astam artty.
«Aqmola, Almaty, Qyzylorda jáne Shyǵys Qazaqstan oblystarynda, sondaı-aq Shymkent qalasy men elordada barlyq negizgi kórsetkishter boıynsha ósim tirkelip otyr. Jaýapty memlekettik organdar men ákimdikter osy jumys qarqynyn saqtaýy kerek. Ol úshin ekonomıkany ártaraptandyrý, ınvestısııalar tartý jáne jańa turaqty jumys oryndaryn qurýdy jalǵastyrý qajet», dedi Álıhan Smaıylov.
Sondaı-aq Úkimet basshysy mamyr aıynyń qorytyndysynda eldegi jyldyq ınflıasııa 14 paıyzdy quraǵanyna nazar aýdartty.
«Azyq-túlik ınflıasııasynyń deńgeıi 19%-ǵa jetti. Buǵan eń aldymen, azyq-túlik taýarlaryna álemdik baǵanyń ósýi áser etip otyr. Memlekettik organdardyń birinshi basshylary men ákimder ınflıasııany tejeý jumysyn kúsheıtip, pármendi is-sharalar qabyldaýy tıis», dedi Premer-Mınıstr.