«Qara shapan –Jaýynda ákem, saýynda sheshem kıgen,Sol shapannyń qoınyna sheker de úıgem.Jamaý-jamaý biz kórgen balalyqtaı,Qaıda qaldy shapanym kósherde úıden?». Jas aqyn Erik Narynnyń osy óleńi kartınadaǵy boıaýmen úndesetin sekildi. Bir detalmen-aq tirliktiń qasiretin kórsetý, ony júrekpen seziný qıyn dúnıe. Biraq jan tolǵanysyńyz tús bolyp tógilgende kenep betinde erkin qalyqtaısyz.
Aq qaǵaz betinde kómir men soýsty qoldaný arqyly keskindeme ónerinen qupııa izdegen jas sýretshi Ásemqul Beıbittiń shyǵarmashylyǵy erekshe. Qarapaıym tásilmen oryndalǵanyna qaramastan, grafıka paraqtarynda qylqalam ıesiniń emosıonaldyq kúızelisi men ishki jan-tebirenisi baıqalyp turady.
Sýretker kompozısııany utymdy sheshý úshin, formany qalyptastyrýǵa erekshe mán beredi. 2015 jyly jazylǵan «Qara ton» týyndysy sózimizge dálel. Shyǵarmada qara ton jamylyp, uıyqtap jatqan áıel adam beınelengen. Munda ómirdiń azaby aýyr uıqymen astasyp jatyr. Ananyń qara tondy jamylyp syrtqy dúnıeden oqshaýlanýy, ózin shekteýi, qorǵanýy, sonymen birge dármensizdigi baıqalady.
Qara ton – sharshap-shaldyǵýdyń belgisi. Uıqy – bul kez kelgen adamnyń bir ýaqytqa tuıyqtalýy, qupııalanýy. Sýretshi kompozısııany joǵarǵy núkteden alyp jazǵan. Iаǵnı keńistikte tereńdik qalyptaspaı, kerisinshe, jazyqtyq betindegi formalar aq qaǵaz betinde oınap, kólem qalyptastyra túsken. Mysaly, tonnyń astyndaǵy adamnyń dene pishini, tonnyń jeńderin jazýy. Bar-joǵy qos tús ári túrli shtrıhtyń ózara kúrdeli baılanysy arqyly ár zattyń, formanyń kólemi nanymdy beınelengen. Baqsańyz, kompozısııadaǵy kishigirim detaldar da qarapaıym sheshilgen. Jerge tóselgen alasha jáne jastyqtar birneshe jolaqpen órilgen. Shárkeıi – bul úıdiń jaılylyǵyn bildiredi. Ol óziniń álemi, áıel adamnyń jeke keńistigi.
Avtor bul jumysty jyldam tamashalaýǵa emes, asyqpaı sýretshiniń qımylymen, oıymen sharpysyp, onyń boıaýmen baıandalǵan qarapaıym sıýjetin kórýge asyǵady. Qansha jerden qarapaıym bolsa da, meıirimdilik, mahabbat sezimderi arqaý bolǵan shyǵarma eleń etkizbeı qoımaıdy. Sýretshi óziniń jeke álemin jasaý arqyly, jalpy, ómirdiń fılosofııasyn uǵynýǵa tyrysady.