Quryqqa túsirgen qýlyq

Máselen, 2019-2021 jyldary berilgen VIP nómirler úshin 59 kólik ıesinen 14 mln teńgeden astam memleket­tik baj bıýdjetke túspegen. Al 78 júrgizýshi 2,7 mln teńge mólsherinde memlekettik baj­dy tolyq kólemde tó­lemegen. Buǵan qosa 52 qyzmet alýshy jalpy somasy 14,4 mln teńge mólsherindegi mem­lekettik bajdy tóleýden negizsiz bosatylypty. Osy­laısha, ótken úsh jylǵa júr­gizilgen monıtorıng qory­tyn­dysymen memleketke 31,5 mln teńgeden astam zalal kel­tirilgen.

Qýlyǵyna quryq boıla­maıtyn pysyqaılar VIP nó­mirdi satyp alý kezinde jal­ǵan túbirtek usynyp, jal­ǵandy jalpaǵynan baspaq bol­ǵan. Biraq olardyń bul qý­lyǵy ózderin quryqqa túsir­di. Atyraý qalalyq pro­ký­ratýrasy kózge tez sha­ly­natyn nómirlerdi jal­ǵan túbirtekpen satyp alǵan­dar­dy anyqtady. Kólik júrgizýshilerine satylǵan nómirlerdiń somasyn bıýdjetke naqty túsimmen salystyryp tekserý kezinde 5 mln teńgeden astam qarajat­tyń túspegeni belgili boldy. «Sándi» nómirlerdi satyp alýshylar tólem jasarda jalǵan túbirtekterdi qoldanyp, memleketke zalal keltirgen. Qazir Atyraý qalalyq prokýratýrasy atalǵan derekke qatys­ty Qylmystyq kodekstiń 190-babynyń 3-bóligimen, 345-babynyń 3-bóligimen sot­qa deıingi tergep-tekserý amal­daryn júrgizip jatyr.

Al Atyraý kólik prokýra­týrasy jeke paıdalanýǵa ar­nal­ǵan kólik quraldaryn Eýra­zııalyq ekonomıkalyq odaq­tyń kedendik aýmaǵyna ýaqytsha ákelý kezinde zańdy­lyqtyń saqtalýyna taldaý júrgizgen. Taldaý kezinde Grý­zııadan ákelingen Toyota Land Sruiser kóligi úshin kedendik tólemdi júrgizbeı, zańsyz memlekettik tirkeýge qoıý deregi áshkerelendi. Kó­lik prokýratýrasynyń aktisi negizinde oblystyq polısııa departamenti qalalyq sotqa talap-aryz berdi. Ony qaraý nátıjesinde, avtokólik ıesi memleket paıdasyna 8 mln teńge kóleminde kedendik baj ben ósimpul tóledi.

Taǵy bir derekke júginer bolsaq, júrgizýshi kýáligin berýde de zańsyzdyq bar eken. Arnaıy taldaý kezinde sot úkimimen kólik basqarý qu­qyǵynan ómir boıyna aıyrylǵan adamdarǵa júr­gizýshi kýáligi berilgeni bel­gili boldy. Atyraý qala­synyń prokýrory Arshat Taı­týllınniń aıtýynsha, tal­daýdyń maqsaty – jolda quqyq buzý­shylyqtyń aldyn alý jáne turǵyndardyń qaýipsizdigin qamtamasyz etý.

– Prokýrorlyq qadaǵa­­laý aktisimen jaýapty tulǵa­­­lar tártiptik jaýapkershilik­ke tartyldy. Budan basqa sot úkimimen kólik basqarý qu­qyǵynan ómir boıyna aıyrylǵan Atyraý qalasy tur­ǵynynyń Almaty qala­syn­daǵy ákimshilik polısııa basqarmasy arqyly júr­gizýshi kýáligin zańsyz al­ǵany anyqtaldy. Osyǵan baı­­lanysty jınaqtalǵan is-qu­jat­tary prosestik sheshim qa­byldaý úshin Sybaılas jem­­qorlyqqa qarsy is-qımyl agent­tiginiń Almaty qalalyq depar­tamentine joldandy, – deıdi Arshat Taıtýllın.

Atyraý oblysy