Ishki ister mınıstrliginiń ókili Shuǵyla Turlybek bir apta ishinde Qazaqstanda 3,5 myńǵa jýyq qylmys jasalǵanyn aıtty, dep habarlaıdy Egemen.kz.
«Bir apta ishinde 3 348 qylmys jasaldy. Onyń 2 124-i táýlik ishinde ashyldy. Polısııa qyzmetkerleri izin sýytpaı kisi óltirýge qatysty - 9, ólimge ákep soqqan densaýlyqqa qasaqana aýyr zııan keltirýdiń - 7, tonaýǵa qatysty - 62 jáne bóten múlikti urlaýdyń 500 qylmysyn ashty», dedi Shuǵyla Turlybek mınıstrliktiń baspasóz alańynda ótken brıfıngte.
Ol sondaı-aq elordada Qazaqstan polısııasynyń 30 jyldyǵyna oraı Ishki ister mınıstriniń kýbogine Makarov tapanshasynan atýdan chempıonat ótkenin aıtty.
Atalǵan saıysqa elimizdiń ár óńirindegi polısııa departamentteriniń namysyn qorǵaý úshin kelgen komandalarmen qatar, basqa da kúshtik qurylymdardyń mergenderi qatysty.
«Týrnırde Ishki ister organdary bólimsheleri men kúshtik qurylymdar arasyndaǵy úzdikter anyqtaldy. Synǵa túsken qyzmetkerler ózderiniń bar sheberlikterin ortaǵa saldy. Chempıonat qorytyndysy boıynsha aýmaqtyq polısııa departamentteriniń arasynda úshinshi oryndy Qaraǵandy oblysy ıelense, ekinshi oryndy Jambyl oblysy enshiledi. Al almatylyq polıseıler jalpykomandalyq esepte top jardy. Kúshtik qurylymdardyń jalpy komandalyq esebinde úzdik úshtik qatarynan Ulttyq ulannyń komandasy kórindi. Mamandandyrylǵan kúzet qyzmeti basqarmasy kúmis júldeni qanjyǵasyna baılasa, Ishki ister mınıstrliginiń qyzmetkerleri quralaıdy kózge atqan mergen dep tanyldy», dedi mınıstrlik ókili.