Qazaqstannyń DSU-ǵa múshe memleketter mınıstrleriniń 12-konferensııasyna tóraǵalyǵy sátti aıaqtaldy, dep habarlady Memleket basshysynyń baspasóz qyzmeti.
2022 jylǵy 17 maýsymda Qazaqstannyń tóraǵalyǵymen Dúnıejúzilik saýda uıymyna múshe memleketter mınıstrleriniń 12-konferensııasy ótti. Jıyn qorytyndysy boıynsha halyqaralyq saýda salasynda asa mańyzdy sheshimder toptamasy qabyldandy. Osy rette birqatar kelisim boıynsha kelissózder ondaǵan jylǵa sozyldy.
DSU-ǵa bar-joǵy jeti jyl buryn ǵana kirgen Qazaqstan – Mınıstrler konferensııasyna tóraǵalyq etken eń jas el. DSU-nyń joǵary basqarýshy organyn Uıymǵa osy ınstıtýt qurylǵannan keıin kirgen jáne teńizge shyǵatyn joly joq Eýrazııa aımaǵynyń eli tarıhta alǵash ret basqardy.
Qazaqstannyń tabysty tóraǵalyq etýine joǵary deńgeıdegi turaqty baılanystar yqpal etti. Jıyn barysynda 12-konferensııanyń kún tártibindegi máseleler men ony daıyndaýǵa kóbirek kóńil bólindi.
Qazaqstan Prezıdenti Qasym-Jomart Toqaev DSU Bas dırektory Ngozı Okondjo-Ivealamen júrgizgen kelissóz barysynda Qazaqstannyń DSU aıasyndaǵy yntymaqtastyǵynyń strategııalyq mańyzyn jáne elimizdiń DSU kelissózder kún tártibindegi sheshilmegen barlyq máseleni retteýge syndarly úles qosýǵa ázir ekenin birneshe ret atap ótti.
Qazaqstan Respýblıkasy Prezıdenti Ákimshiligi Basshysynyń birinshi orynbasary Tımýr Súleımenov atalǵan 12-konferensııaǵa tóraǵa boldy.
DSU Bas dırektory Ngozı Okondjo-Iveala Qazaqstannyń tóraǵalyǵyna joǵary baǵa berip, Konferensııaǵa daıyndyq aıasyndaǵy jemisti yntymaqtastyǵy, sondaı-aq koronavırýs pandemııasyna baılanysty osy jahandyq is-sharany Nur-Sultannan Jenevaǵa aýystyrýdy qosa alǵanda, túrli syn-qaterlerdi eńserýdegi sheberligi men eptiligi úshin elimizdiń basshylyǵy men Úkimetine rızashylyǵyn bildirdi.
Konferensııa qorytyndysy boıynsha DSU-ǵa múshe 164 eldiń saýda mınıstrleri zańsyz, habarlanbaıtyn jáne rettelmeıtin balyq kásipshiligine yqpal etetin sýbsıdııalarǵa tyıym salý týraly tarıhı kelisimdi qabyldady. Bul kelisim azyq-túlik qaýipsizdigi men jumys oryndary turǵysynan balyq aýlaýǵa táýeldi qoǵamdastyqtar úshin tirshilik etý quralyn saqtaý maqsatynda balyqty shamadan tys aýlaýdy shekteýge baǵyttalǵan.
DSU-ǵa múshe memleketter mınıstrleriniń 12-konferensııasynda qabyldanǵan qaýipsiz ári tıimdi vaksınalardy óndirý, damýshy jáne nashar damyǵan elderge vaksınalar berýdi keńeıtý jónindegi zııatkerlik menshik quqyqtaryn shekteý múmkindigi týraly sheshim COVID-19 pandemııasynyń aldyn alý, ony emdeý nemese taralýyn tejeý úshin úlken mańyzǵa ıe.
Azyq-túlik baǵasynyń ósýine baılanysty kedeı elderdiń halqyn tamaq ónimderimen qamtamasyz etý úshin BUU Dúnıejúzilik azyq-túlik baǵdarlamasy aıasynda kórsetiletin azyq-túlik kómegin eksporttyq tyıymdardan nemese shekteýlerden shyǵaryp alý týraly sheshim qabyldandy.
Mınıstrler kórsetiletin sıfrlyq qyzmetter men ónimderdi, ásirese pandemııa jáne ekonomıkany qalpyna keltirý kezeńinde damytýdyń mańyzdylyǵyn moıyndaı otyryp, Elektrondyq saýda jónindegi jumys baǵdarlamasyn iske asyrýdy jalǵastyrýǵa jáne elektrondyq tranzaksııalar kezinde kedendik bajdardy alý moratorııin DSU-nyń kelesi mınıstrlik konferensııasyna deıin uzartýǵa kelisti. Bul sheshim bıznes pen tutynýshylar úshin aıqyndylyq pen boljamdylyqty qamtamasyz etedi, sondaı-aq sıfrlyq ekonomıkany damytýdyń artyqshylyqtaryn kórsetýge septigin tıgizedi.
DSU Bas dırektory mınıstrlerdiń 12-konferensııasynda sóılegen qorytyndy sózinde saýda qazirgi daǵdarystardy sheshýdiń bir bóligi ekenin jáne qol jetkizilgen kelisimder toptamasy DSU-ǵa múshe elderdiń geosaıası jarylystardy eńserý, álem qoǵamdastyǵynyń problemalaryna den qoıý, ekologııalyq problemalardy sheshý jáne aýqymdy áleýmettik-ekonomıkalyq ıntegrasııaǵa járdemdesý úshin birigýge qabiletti ekenin atap ótti.
Buryn-sońdy bolmaǵan sheshimder sany DSU-ǵa múshe memleketter mınıstrleriniń 12-konferensııasynyń ereksheligi bolyp tabylady. Bul DSU-nyń halyqaralyq saýda qaǵıdalaryn ázirleý jáne retteý jónindegi jalǵyz kópjaqty alań bolyp qala beretinin, sondaı-aq asa ózekti jahandyq problemalardy sheshýde mańyzdy ról atqaratynyn bildiredi.