«Qarasora-2022» jedel-profılaktıkalyq is-sharasy aıasynda qyzylordalyq polıseıler taǵy da iri esirtki alqabyn joıdy. Qazir atalǵan derek boıynsha sotqa deıingi tergep-tekserý áreketteri júrgizilýde.
Polısııa departamentiniń Esirtki qylmysyna qarsy is-qımyl basqarmasy men UQK Qyzylorda oblysy jáne Baıqońyr qalasy boıynsha departamenti qyzmetkerleri birlesip júrgizgen operasııa barysynda Shıeli aýdanyna qarasty dalalyq alqapta 1 665 túp sora ósimdigin ekken azamat ustaldy. Kúdiktini tintý kezinde odan keptirilgen marıhýana alyndy.
Maýsym aıynyń ortasynda polıseıler Jalaǵash aýdanynda qalyń sheńgel arasynda egilgen dál osyndaı iri alqapty anyqtap, 1 149 túp sorany joıǵan edi.
Oblystyq polısııa departamentiniń basshysy Bektóre Sultannyń aıtýynsha, óńirde 5 aı ishinde 73 qylmys tirkelip, olardy tergep-tekserý barysynda marıhýana men sıntetıkalyq esirtki tárkilenip alynǵan. Osy eseptik merzimde esirtkige qatysty qylmystardyń ashylýy 53 paıyzdy qurap otyr.
Quqyq qorǵaýshylar aımaqta marıhýananyń úndi jáne gollandtyq túrlerin ósirýdi kásipke aınaldyrǵandardyń bar ekendigin aıtady. Elimizde 1 maýsym – 31 qazan aralyǵynda ótetin «Qarasora» jedel-profılaktıkalyq is-sharalary aıasynda qalalar men aýyldardaǵy baý-baqshalar, sharýa qojalyqtarynyń aýmaqtary jáne oblystyń barlyq dalalyq jerlerinde áýeden monıtorıng jasalyp jatyr.
Dál osy másele jaqynda ótken quqyq buzýshylyq profılaktıkasy jónindegi vedomstvoaralyq komıssııa otyrysynda da qaraldy. Oblys ákimi Nurlybek Nálibaevtyń tóraǵalyǵymen ótken jıynǵa jaýapty sala basshylary men birqatar aýdan ákimderi qatysty.
Oblys ákimi esirtkige qatysty qylmystardy ashýǵa baılanysty birqatar naqty tapsyrma júktedi.
– Esirtki zattary tasymaldanatyn kanaldardy, daıyndaıtyn jáne ótkizetin oryndardy anyqtap, pármendi áshkereleý sharalary qabyldansyn. Osy baǵytta zamanaýı tehnologııalardy keńinen paıdalaný múmkindikterin qarastyrǵan jón. Esirtkimen kúres jalǵyz polıseılerdiń ǵana jumysy emes. Qoǵam keseline qarsy kóp bolyp jumylýymyz kerek. «Ǵaryshtyq monıtorıng» qyzmetin qoldaný úshin oblystyq ekonomıka jáne qarjy basqarmasymen birlesip, usynys berilsin. Oblystyq qoǵamdyq damý basqarmasymen birlesip, zańsyz esirtki aınalymy úshin quqyqtyq jaýaptylyqty túsindirý zańnamaǵa sáıkes buqaralyq aqparat quraldary arqyly keńinen jarııalanýy kerek, – dedi N.Nálibaev.
Sonymen qatar nashaqorlyqqa jáne esirtki bıznesine qarsy is-qımylǵa baǵyttalǵan qyzmetti úılestirý jónindegi oblystyq shtabtyń jumysyn kúsheıtip, jastar jıi qoldanatyn áleýmettik jelilerde nashaqumarlyqtyń zııany týraly arnaıy beınerolıkter men posttar jarııalaý qajet ekenin basa aıtty.
Komıssııa otyrysynda ınternettegi alaıaqtyq qylmystar máselesi de aıtyldy. Oblystyq polısııa departamentiniń basshysy Bektóre Sultan 5 aıda alaıaqtyq qylmystyń 297 deregi tirkelip, bul qylmys túriniń ótken jylmen salystyrǵanda 27,4 paıyzǵa tómendegenin jetkizdi. Anyqtalǵan qylmystardyń 53,1 paıyzy ınternet alaıaqtyq sıpatynda bolǵan.
Komıssııa otyrysynda aımaq basshysy alaıaqtyq, qarjy pıramıdasy, ınternet jáne áleýmettik jeliler arqyly jasalatyn quqyq buzýshylyqtyń aldyn alý jumystaryn kúsheıtý qajettigin atap ótti. Ásirese ınternet alaıaqtyqtyń jolyn kesý úshin naqty sharalar qabyldap, adam sanasyn arbaıtyn túrli jazbalar men aqparattardan saqtandyratyn ımmýnıtet qalyptastyrý qajettigi sóz boldy.
Qyzylorda