Úndistannyń bas shahary – Delıdegi Indıra Gandı atyndaǵy jabyq stadıonda velotrekten eresekterdiń 41-shi, jasóspirimderdiń 28-shi jáne para-sportshylar arasyndaǵy 10-shy Azııa chempıonaty óz máresine jetti. Jyl saıyn uıymdastyrylatyn Sary qurlyq birinshiligine bıyl 15 eldiń úzdikteri jınaldy. Munda Parıj Olımpıadasynyń irikteýine upaı beriledi.
Sportty damytý dıreksııasynyń málimeti boıynsha qazaqstandyq sportshylar Delıde táýir nátıje kórsetip, bir altyn, bir kúmis jáne eki qola medal jeńip alǵan. Atap aıtar bolsaq, jasóspirimder arasyndaǵy bir shaqyrym qashyqtyqty ýaqytqa jarys básekesinde qazaqstandyq Kırıll Kýrdıdı aldyna jan salǵan joq. Chempıonnyń kórsetkishi – 1:02.840 sekýnd. Ońtústikkoreıalyq Chon Vý Kım kúmis, japonııalyq veloshabandoz Mınato Nakanısı qola júldeger atandy.
Eki Olımpıadada baq synaǵan tájirıbeli otandasymyz Artıom Zaharov omnıým baǵdarlamasynda 123 ball jınap, kúmis júlde jeńip aldy. Bul synda japonııalyq Sıýnsýke Imamýra top jarsa (152 upaı), Muhammed Gandjhanlý 120 upaı jınap, Iran qorjynyna kezekti qola júldeni saldy.
Sondaı-aq áıelder arasyndaǵy omnıým jarysynda qazaqstandyq Rınata Sultanova 121 upaımen úzdik úshtikti túıindedi. Japonııa sportshysy Sýıako Ýchıno Azııa chempıony atansa (139 upaı), ındonezııalyq Delııa Aıýstına Prıatna 123 upaımen ekinshi orynǵa taban tiredi.
Aıta keteıik, omnıýmdy velotrektegi kópsaıys dep ataýǵa bolady. Iаǵnı veloshabandozdar bir kúnde birneshe baǵdarlama boıynsha jarysady. Omnıýmnan Olımpıada júldesi alǵash ret 2012 jyly Londonda sarapqa salyndy. 2016 jyldan bastap kópsaıystyń quramynda 4 baǵdarlama qaldy. Olar: skretch (munda márege kim birinshi kelse, sol jeńedi), upaıǵa talas, jan baǵý (ár belgilengen aınalymda sońǵy bolyp máre syzyǵyn kesken sportshy jarystan shyǵyp otyrady) men iz kesý jarysy. Baıqaǵanyńyzdaı, nátıjesinde eń kóp upaı jınaǵan atlet jeńiske jetedi.
Al keırın básekesinde óner kórsetken otandasymyz Sergeı Ponomarıov el qorjynyna ekinshi qola júldeni saldy. Ol bul jarysta Koheı Terasakı (Japonııa) men Shah-fırdaýs Muhammed Sahromǵa (Indonezııa) ese jiberdi. Osy baǵdarlamada jarys jolyna shyqqan taǵy bir qazaqstandyq Andreı Chýgaı altynshy satyǵa jaıǵasty.
Keırın – ótken ǵasyrdyń ortasynan bastap Japonııada qarqyndy damyǵan trektegi velojarys túri. Sportshylar 2 shaqyrymǵa jarysady. Trektegi synǵa bir mezette kem degende 6, ári ketse 9 sportshy shyǵady. Pozısııa jerebe arqyly anyqtalady. Olar sórede jankúıerlerge qarap 2 ret ıilip sálem berýi qajet. Veloshabandozdar bir jarym shaqyrym boıy kósh bastap júretin arnaıy adam – peıserdiń sońynan erip, ózine yńǵaıly pozısııa úshin talasady. Al 500 metr qalǵan kezde peıser shetke shyǵyp, márege deıin qyzý talas júredi. 2000 jyldan bastap bul jarys Olımpıada baǵdarlamasynan túsken emes.
Aıta keteıik, trek pen tasjoldaǵy velosporttan qurlyq chempıonaty 2017 jyldan bastap bólek uıymdastyrylady.