«Egemen Qazaqstan» gazetinde bıylǵy 21 sáýirde jarııalanǵan Aqushtap Baqtygereevanyń «Júregim aýyrady» degen maqalasyn oqyǵannan keıin qart ana retinde qolyma qalam alǵandy jón kórdim. Maǵan aqynnyń júrek tolǵanysyn jerine jetkize jazǵany unady. Meni de qazirgi kezde jastardyń, ásirese qyz balalardyń júris-turysy, kıim kıisi, sóz saptaý mánerleri qatty oılandyrady.
О́z basym el gazeti – «Egemen Qazaqstan»-nyń baıyrǵy oqyrmanymyn. Onda jarııalanatyn toǵaqty materıaldardy tushyna oqımyn. Al jastar tárbıesine qatysty aıtatyn bolsam, olardyń oǵash is-áreketterine biz – úlkender beıjaı qaramaýymyz kerek dep esepteımin. Biraq bir ókinishtisi, eskertý jasasań, jastardyń birazy: «Sizderdiń zamandaryńyz ben bizdiń zamanymyzdy salystyrmańyzdar, bizdiń jańasha ómir súrgimiz keledi», dep tótesinen qaıyrady. Qandaı ýáj aıtaryńdy bilmeı, tosylyp qalasyń.
Sonda da biri bolmasa, biri oılanar degen úmitpen aqyl-keńesińdi aıtýdan jalyqpaısyń. Al ashyǵyna kóshetin bolsaq, búginde burymdy qyzdar múldem kózge túspeıtin bolyp barady. Qaı-qaısynyń da shashyn jaıyp jiberip, jalbyratyp júrgenin kóresiń. Munyń jaman yrym ekenin solar bilmese kerek. Bul azdaı, kindikterin ashyp tastaıdy. Jel tıip, aýyryp qalsa qaıtpek. Surap alǵan aýrýdyń aýyr tıetini bar. Buǵan qosa, búginde jyrtyq djınsı sánge aınalǵan. Muryndaryna syrǵa taǵyp alǵan qyzdardy da kezdestirip qalasyń.
Bizdiń qyzdar men áıelderge arnalǵan ulttyq kıimderimizdiń basqa eshbir ulttykinen artyq bolmasa, esh kemdigi joq ekenine bás tige alamyn. Árıne, jumys ornynda, qyzmette zamanyńa qaraı kıiný kerek ekenin túsinemiz. Degenmen kóringenge eliktep, saltymyzǵa jat turǵyda ashyq-shashyq kıinip júrý ózińdi ǵana emes, tutas ultyńdy syılamaý dep bilemiz. Qazirgi jastarymyz, ásirese, qyz balalar osyny túsinse eken!
Raısa YBYRAEVA,
zeınetker ana
NUR-SULTAN