Jetinshi qabattan qulaǵaly turǵan balany qutqarǵan Esdáýlet Dáýitbekov «Tótenshe jaǵdaıdaǵy erligi úshin» tósbelgisimen marapattaldy, dep habarlaıdy Egemen.kz Tótenshe jaǵdaılar mınıstrliginiń baspasóz qyzmetine silteme jasap.
«Búgin Tótenshe jaǵdaılar mınıstrliginde mınıstr Iýrıı Ilın erligimen kózge túsken Dáýitbekov Esdáýlet Esbolatulyn «Tótenshe jaǵdaıdaǵy erligi úshin» tósbelgisimen jáne estelik syılyqpen marapattady. Kezdesýge batyrdyń anasy Ásemgúl Qabdyqalyqova da qatysty», delingen resmı habarlamada.
Iýrıı Ilın búginginiń batyryna alǵys bildirip, bolashaqta TJM azamattyq qorǵaý organdarynyń qatarynan osyndaı er jigitterdi kórgisi keletinin aıtty. Sonymen qatar anasyna naǵyz batyrdy tárbıelegeni úshin alǵys bildirdi.
Eske salsaq, oqıǵa 13 shildede Nur-Sultandaǵy «Sherqala» turǵyn úı kesheninde bolǵan. 17 jastaǵy bozbala qutqarý bólimsheleri kelgenge deıin kórshi úıdiń terezesinen ótip, 7-qabattan qulaǵaly turǵan balany qutqarǵan edi.
Oqý-aǵartý mınıstri Ashat Aımaǵambetov elordalyq mektep túlegi Esdáýlet Dáýitbekovke bilim grantyn tabystady.
Sondaı-aq, elordalyq mesenat 3 bólmeli páter syılady.
Osy oraıda, tótenshe jaǵdaılar mınıstrligi turǵyndarǵa taǵy da eskertý jasady.
«Qurmetti ata-analar, bul – bala aman-esen qutqarylǵan az ǵana mysaldardyń biri. Biraq, ókinshke qaraı, qaıǵyly aıaqtalatyn oqıǵalar kóp kezdesedi. Balalardy eresekterdiń qaraýynsyz qaldyrmańyz! Eger úıde kishkentaı bala bolsa, terezelerdi ashyq qaldyrmańyz, óıtkeni balanyń qulaýyna sanaýly ǵana sekýndtar jetkilikti. Bul bala ólimine ákep soǵýy ábden múmkin», deıdi tótenshe jaǵdaılar mınıstrligi.