Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Álı Bektaev GFR Azyq-túlik jáne aýyl sharýashylyǵy Federaldy mınıstri janyndaǵy stats-hatshy Ofelııa Nıkpen kezdesti.
Álı Bektaev Qazaqstan mańyzdy tarıhı damý kezeńinde ekenin atap ótti. Prezıdent Qasym-Jomart Toqaevtyń bastamasy boıynsha barlyq salada keshendi jáne júıeli ózgerister júrgizilýde. Elimizdiń saıası júıesin odan ári demokratııalandyrý – basty baǵyttardyń biri. Reformalardyń bári ahýaldyq turǵyda emes, strategııalyq sıpatqa ıe.
«Agroónerkásiptik keshendi damytý, organıkalyq ónim óndirý jáne halyqty azyq-túlikpen qamtamasyz etý – Qazaqstandaǵy basymdyqtardyń biri. Qazaqstan jańartylatyn jáne balama energııa kózderinen óndiriletin elektr energııasynyń jalpy kólemindegi jańartylatyn energetıka úlesin tutynatyn barlyq energııanyń keminde jartysyna jetkizýge nıettenip otyr», dedi senator Álı Bektaev.
Ofelııa Nık óz kezeginde jyly shyraıly qabyldaý men elder arasyndaǵy ekijaqty yntymaqtastyq máselelerin talqylaý múmkindigi úshin alǵysyn bildirdi.
Taraptar kezdesý barysynda elimizdiń Salyq kodeksine qabyldanǵan túzetýlerdi, onyń ishinde ınvestısııalar kólemi men merzimine jáne jumys ornyna baılanysty ınvestorlardy korporatıvtik, tabys, jer salyǵynan jáne qosymsha qun salyǵynan 10 jylǵa deıingi merzimge bosatýǵa múmkindik beretin jaıttardy talqylady.