Eýropada aýa temperatýrasynyń rekordtyq kórsetkishteri tirkeldi. Ǵalymdar buny klımattyń ózgerýimen baılanystyrady, dep habarlaıdy Egemen.kz.
Deutsche Welle habar taratqandaı, Ispanııa men Portýgalııadaǵy aptap ystyqtan qaza tapqandardyń sany myńnan asty.
17 shildede Madrıdte temperatýra +39°C deıin kóterilse, eldiń shyǵysyndaǵy Don Benıtoda +43,3°C rekordtyq kórsetkish tirkeldi.
Ispanııada 16 shildede kem degende 360 adam qaıtys boldy. Olardyń ishinde Madrıd provınsııasynda 22 adam kóz jumdy, olardyń bireýi 60 jastaǵy tazalaýshy jumys istegen jerinde qaıtys boldy.
Taǵy bir 50 jastaǵy er adam kóshede qaıtys boldy. Dárigerler zardap shekken adamǵa kómektese almady, onyń dene qyzýy +40°C deıin kóterilgen.
Portýgalııa teńiz jáne atmosfera ınstıtýtynyń – Eldiń ulttyq meteorologııalyq agenttiginiń málimetteri boıynsha 14 shildede portýgaldyq Pınıanda +47°C rekord tirkeldi.
«Portýgalııadan Ortalyq Fransııaǵa deıin jáne Eýropanyń ońtústik-shyǵysyndaǵy aýdandarda shyjyǵan ystyq 20 kún boıy saqtalady degen qorqynysh bar», dedi amerıkalyq boljaý qyzmetiniń aǵa meteorology Taıler Roıs.
Onyń aıtýynsha, aptap ystyq Vengrııany, Horvatııanyń shyǵysyn, Bosnııa men Gersegovınany, Serbııany, Rýmynııanyń ońtústigi men Bolgarııanyń soltústigindegi birqatar óńirlerdi qamtıdy.