Atyraý oblysyndaǵy Teńiz ken ornynda tamaqtan ýlanǵan 11 adam aýrýhanada jatyr. Jumysshylar tamaqtan ýlanǵan ashanaǵa tekserý júrgiziledi, dep habarlaıdy Egemen.kz.
Atyraý oblystyq sanıtarlyq-epıdemıologııalyq baqylaý departamentiniń baspasóz qyzmetinen málim etkendeı, Teńiz ken ornynda tamaqtan ýlanǵan 30-dan astam jumysshy medısınalyq kómekke júgingen.
«Jumysshylardyń barlyǵy «KazPromStroı Injınırıng» JShS-ǵa tıesili ashanada túski as ishken. Alǵashqy kómek kórsetilgennen keıin jumysshylardyń kópshiligi ambýlatorııalyq emdelýge jiberildi. Jylyoı aýdanynyń ortalyǵy – Qulsary qalasyndaǵy ortalyq aýrýhanaǵa on bir adam jetkizildi. Naýqastarda qusý, dıareıa, bezgek, bas aýrýy, jalpy álsizdik baıqalǵan. Aldyn ala dıagnoz – taǵamdyq toksıkoınfeksııasy», dep habarlady departamenttiń baspasóz qyzmeti.
Tamaqtan ýlanyp, aýrýhanaǵa túsken naýqastardyń jaǵdaıy ortasha aýyr dep baǵalanǵan. Atyraý oblystyq sanıtarlyq-epıdemıologııalyq baqylaý departamentiniń mamandary jumysshylar tamaqtan ýlanǵan ashanadan synama alyp, Ulttyq saraptama ortalyǵyna jiberdi.
Zerthanalyq zertteýlerdiń nátıjeleri úsh kún ishinde alynady. Departament mamandary jumysshylar túski as ishken ashananyń jumysyna jospardan tys tekserý júrgizýdi josparlap otyr.
Buǵan deıin Atyraý oblysyndaǵy Teńiz ken ornynda 30-dan astam jumysshy tamaqtan ýlanyp qalǵany týraly jazǵan bolatynbyz.