Qazirgi tańda medısınanyń qaı salasynda da jetildirilgen ınnovasııalyq tehnologııalar bar. Mundaı ozyq medısınalyq quraldar adam qoly jetpeıtin jerge jetedi, eń kúrdeli operasııalardy aǵzaǵa zııanyn tıgizbeı júzege asyra alady. Alaıda kez kelgen tehnologııany adam basqaratyndyqtan, ony meńgergen mamandar mashyǵy qashanda qundy.
Almatydaǵy Kardıologııa jáne ishki aýrýlar ǵylymı-zertteý ınstıtýtynda I.Sechenov atyndaǵy Máskeý memlekettik medısına ýnıversıtetiniń №1 ýnıversıtettik klınıkalyq aýrýhanasynyń jetekshi arıtmology Alekseı Syganov júrek yrǵaǵynyń kúrdeli buzylystaryn kateterlik emdeý salasyndaǵy ınnovasııalyq tehnologııalardy qoldana otyryp, otandyq dárigerlerge sheberlik dárisin ótkizdi.
Bir jaǵynan KIAǴZI-da ornatylǵan CARTO 3 V7 Prime júrekishilik navıgasııasynyń biregeı úsh ólshemdi júıesiniń bolýy eń kúrdeli, onyń ishinde júrek yrǵaǵynyń buzylýyna jáne ilespe patologııalarǵa baılanysty kúrdeli operasııalardy jasaýǵa múmkindik berip otyr. 3D-tehnologııalar 1 mıllımetrge deıin arıtmııanyń kózin tabýǵa jáne ony joıýǵa múmkindik beredi.
«Bizdiń klınıkada bar jabdyq úzdik standarttarǵa saı bolǵandyqtan, júrek yrǵaǵy buzylǵan naýqastarǵa kez kelgen kúrdeli otany jasaı alamyz. 2010 jyldan beri klınıkada júrek yrǵaǵy túrli buzylystarynyń radıojıilikti ablasııasy, onyń ishinde júrekshe fıbrıllıasııasy, krıoablasııa men basqa da jedel hırýrgııalyq operasııalar sátti jasalyp keledi», deıdi ǴZI basqarma tóraǵasy, professor Roza Qýanyshbekova.
«Arıtmologııa – bilim men klınıkalyq tájirıbe salasy retinde jyldam jańaryp qana jatqan joq, sonymen qatar kardıologııanyń eń kúrdeli bólimderiniń biri. Jaqsy maman bolý úshin únemi oqý qajet. Sondyqtan jetekshi medısınalyq ortalyqtarmen yntymaqtastyq sheńberinde biz únemi sheberlik klastar, semınarlar ótkizip turamyz. Mundaǵy maqsatymyz – mamandarymyzdyń áriptesterimen aralasýǵa, biliktiligin arttyrýyna, jańa bilim alýyna, jańa jabdyqtarda jumys isteýine múmkindik jasaý», deıdi klınıka basshysy.
Mundaı sheberlik dáristeri ıntervensııalyq arıtmologııanyń zamanaýı tehnologııalaryn qoldanýda mamandardy mashyqtandyra otyryp, júrek yrǵaǵynyń qaqpaqshalyq buzylystary bar pasıentterde júrekishilik elektrofızıologııalyq zertteýler men kateterli ablasııany qoldanýdy, jasandy qaqpaqshaǵa almastyrýda biliktilikti arttyrýdy kózdeıdi.
Jas mamandardyń qatysýymen ótken sheberlik dárisi barysynda júrek yrǵaǵynyń kúrdeli buzylystary bar túrli jastaǵy pasıentterge operasııa jasaldy. Olardy júrek jumysyndaǵy úzilister, entigý, álsizdik, bas aınalý, tez sharshaý sekildi belgiler mazalaǵan.
Bul tehnologııalardyń mánisi mynada. Pasıentterdiń júrek qurylymy týraly barlyq derekti beretin 3D kartalaryn jasaý. Ol júrek yrǵaǵy buzylýlary dıagnostıkasynyń dáldigin arttyrý men kateterdi oqshaýlaý esebinen emdeý tıimdiligin arttyrýǵa, qaıtalanatyn operasııalardyń qajettiligin azaıtýǵa, ınfarkt, júrek jetkiliksizdigi, ınsýlt sııaqty kenetten bolatyn ólim men asqynýlardyń sanyn azaıtýǵa múmkindik beredi.
Sheberlik dárisi barysyndaǵy operasııalar sátti ótti. Klınıkada sońǵy jyldary 3 myńnan astam osyndaı operasııa jasalǵan.
ALMATY