Petropavlda bıyl jospar boıynsha 119 nysan múgedektigi bar adamdarǵa ońtaılandyrylmaq. Onyń jartysyna jýyǵy - memlekettik mekemeler, dep habarlaıdy Egemen.kz.
SQO-nyń qoǵamdyq keńesinde múmkindigi shekteýli adamdarǵa áleýmettik nysandardyń qoljetimdiligin arttyrý boıynsha atqarylyp jatqan jumys jaıynda esep berildi. Petropavl qalasynyń jumyspen qamtý jáne áleýmettik baǵdarlamalar bólimi basshysynyń orynbasary Iýlııa Birjanovanyń aıtýynsha, 2021-2025 jyldardy qamtıtyn jospar bar. Qujat boıynsha osy aralyqta 544 áleýmettik ınfraqurylym nysany erekshe qajettiligi bar adamdar úshin ońtaılandyrylýy kerek.
«Byltyr 102 nysan múgedektigi bar adamdar úshin beıimdeldi. Bıyl 119 nysanda osyndaı jumystar júrgizilýi tıis. Onyń 64-i – memlekettik mekemeler. Sonyń ishinde 53-i – bilim berý, 6-ýy – mádenıet jáne sport nysany, 4 – aýmaqtyq memlekettik mekeme jáne bireýi densaýlyq saqtaý nysany. Jumys qyrkúıek aıyna deıin aıaqtalýy tıis. Qazirgi ýaqytta nysandardyń 24-i beıimdeldi», deıdi Iý.Birjanova.
Mamannyń aıtýynsha, tek bilim nysandaryn múgedektigi bar adamdarǵa yńǵaıly etýdiń ózine 37 mln teńge kerek.
«Petropavldaǵy áleýmettik mańyzy bar uıymdardyń erekshe qajettiligi bar adamdar úshin qoljetimdi bolýy únemi tıisti organdardyń baqylaýynda. Másele Petropavl qalasy ákimdiginiń janyndaǵy múmkindigi shekteýli adamdardyń isi boıynsha úılestirý keńesiniń otyrystarynda da kóterilip keledi. Jyl basynan monıtorıngtik toptar 31 nysandy aralap, anyqtalǵan sáıkessizdikter boıynsha usynym berdi, túsindirý jumysyn júrgizdi», dedi ol.