Nur-Sultanda halyqtyń áleýmettik osal sanatyndaǵy talapkerlerge oqý aqysy tólenedi. Bul týraly elorda ákimi Altaı Kólginov málimdedi, dep habarlaıdy Egemen.kz.
«Bilim alý jáne túlekterdiń odan ári jumysqa ornalasýy úshin jaǵdaı jasaýdyń mańyzy óte zor. Máselen, jańa oqý jylynda pedagogıkalyq jáne medısınalyq mamandyqtar boıynsha joǵary bilim alýǵa 1300-ge jýyq grant bólýdi josparlap otyrmyz. Odan bólek áleýmettik kómek boıynsha jeke baǵdarlama qarastyrylǵan», dep jazdy ákim Instagram paraqshasynda.
Ol áleýmettik kómek jaǵdaıy tómen otbasylardan shyqqan talapkerlerdiń qala ýnıversıtetterinde bilim alýy úshin oqý aqysyn tóleý túrinde áleýmettik kómek kórsetiletinin aıtty.
«Bul baǵdarlama boıynsha qujattardy qabyldaý 21 tamyzǵa deıin (qosa alǵanda) jalǵasady. Oqý aqysyn tóleý túrindegi áleýmettik kómek jetim balalar, balalar úıiniń túlekteri, bala kúninen múgedek, kópbalaly otbasylardan shyqqan balalar jáne t.b. arasynda bólinedi.
Bilim alý eńbek naryǵynda suranysqa ıe mamandyqtar boıynsha júrgiziledi: bıotehnologııa, esepteý tehnıkasy jáne baǵdarlamalyq qamtamasyz etý, geodezııa jáne kartografııa (web-kartografııa), sáýlet (BIM-menedjer jobalaýshy), mektepke deıingi oqytý, jerge ornalastyrý-agroınjenerııa, ınjener, jalpy medısına, pedagogıka, IT mamany, áleýmettik jumys, jylý energetıkasy, azyq-túlik ónimderiniń tehnologııasy, elektr energetıkasy jáne t.b», dedi Kólginov.
Eloda ákiminiń aıtýynsha, qalanyń joǵary oqý oryndarynda oqý aqysyn tóleý túrinde áleýmettik kómek alý úshin qalanyń jumyspen qamtý jáne áleýmettik qorǵaý basqarmasyna (Beıbitshilik kóshesi, 9) habarlasý kerek nemese qujattardy elektrondy túrde veb-portaldaǵy «elektrondyq ótinish» bólimi arqyly tapsyrý qajet.
«Áleýmettik kómek otbasynyń bir múshesi úshin 4 eń tómengi kúnkóris deńgeıi mólsherinen (190 088 teńge) aspaıtyn, jan basyna shaqqandaǵy ortasha tabysy bolǵan kezde aqshalaı tólem túrinde taǵaıyndalady. Tolyq aqparatty ákimdiktiń resmı saıtynan oqýǵa bolady», dep jazdy ol.