Energetıka mınıstri Bolat Aqsholaqov elimizde beıindi memlekettik organdardyń baqylaýyndaǵy tapshy taýarlar úshin biryńǵaı taýar bırjasy iske qosylatynyn jetkizdi, dep habarlaıdy Egemen.kz.
«Baǵalyq aýytqýlarǵa jol bermeı, suıytylǵan munaı gazynyń saýda-sattyǵyn iske qosý boıynsha is-sharalar qabyldaý tapsyryldy. Máselen, Memleket basshysy Qasym-Jomart Toqaevtyń tapsyrmasyna sáıkes suıytylǵan munaı gazy bırjasyna kóshý 2023 jylǵy 1 qańtarǵa aýystyryldy. Osy jylǵy 20 shildede bırjalyq saýda-sattyq kezinde baǵanyń kúrt kóterilýine jol bermeýge múmkindik beretin Bırjalyq saýdanyń úlgilik qaǵıdalaryna ózgerister engizildi», dedi mınıstr Ortalyq kommýnıkasııalar qyzmetinde ótken baspasóz máslıhatynda.
Onyń aıtýynsha, búgingi tańda suıytylǵan munaı gazyn kólikke ilespe júk qujattardy resimdeýge mindetti taýarlar tizbesine engizý, ótkizý kólemi men baǵasyn kórsete otyryp, avtogaz quıý stansasynyń fıskaldyq chekterdi shyǵarýy boıynsha talaptardy qatańdatý syndy ózgerister pysyqtalýda.
«Sondaı-aq beıindi memlekettik organdardyń baqylaýyndaǵy tapshy taýarlar úshin biryńǵaı taýar bırjasyn aıqyndaý máselesi qarastyrylýda. Joǵaryda kórsetilgen is-sharalar ashyqtyqty qamtamasyz etýge jáne suıytylǵan gaz saýdasy kezindegi operasııalardy qadaǵalaýǵa múmkindik beredi», dedi Bolat Aqsholaqov.