Aqsaqaldar keńesi Bishkekte bas qosty

Ikram Adyrbekov keńestegi sóı­legen sózinde álemdegi geosaıası jaǵdaılardyń kún sanap  kúrdelenip bara jatqanyn atap ótti. Osy rette Túrki mem­leket­teri arasyndaǵy birlik pen yntymaqtastyqtyń mańyzy erek­she arta túsetinine toqtaldy.  Oǵan Aqsaqaldar keńesiniń kezekti oty­rysy da óz úlesin qosatynyna senim bildirdi. Keńes múshelerin Qazaq­standa oryn alǵan mańyzdy oqı­ǵalarmen jan-jaqty tanystyryp ótken ol, ásirese, Prezıdent Qasym-Jomart Toqaevtyń bastamasymen konstıtýsııalyq reforma boıynsha 5 maýsymda ótken búkilhalyqtyq referendýmnyń mańyzdylyǵyna toqtaldy. Konstı­týsııanyń 32-babyna en­gizil­gen ózgeristerdi daýys bergen azamattardyń 77,1 paıyzy qoldaǵanyn atap kórsetti. Aldaǵy ýaqytta osy ózgeristerge sáıkes keń aýqymdy saıası reformalar kútile­tinin aıtty.

Sonymen qatar mamyr aıynda Qazaqstan Prezıdenti memlekettik saparmen Túrkııa respýblıkasyna baryp, asa mańyzdy qujat – «Keńeıtilgen strategııalyq serik­­tes­tik» deńgeıine kóterý týraly Dek­larasııany Prezıdent Rejep Taııp Er­doǵanmen birge qabyl­daǵanyn keńes múshelerine baıandady. Bul sheshim barlyq negizgi baǵyttarǵa, onyń ishinde áskerı-tehnıkalyq salada da ynty­maq­­tastyqty odan ári keńi­nen qar­qyn­dy damytýǵa múm­kindik bere­tinine senim bildirdi.

Bıylǵy Bishkekke jasaǵan mem­lekettik saparynda Prezıdent Qasym-Jomart Toqaev Qazaqstan-Qyr­ǵyzstan araqatynasyn jańa deńgeıge kóteretin kóptegen ma­ńyz­dy sheshimderge jol ashty, eki el arasyndaǵy yntymaqtastyq, baýyr­lastyq aıryqsha qarqyn ala bastady.

Jýyrda Qyrǵyzstanda ótken Ortalyq Azııa memleketteri bas­shy­larynyń IV konsýltatıvtik kezde­sýine Prezıdent Q.Toqaev qatysyp, Ortalyq Azııa ornyqty áleýmettik-eko­no­mıkalyq damý­dyń, beıbitshilik pen órken­deýdiń aımaǵyna aınalýǵa tıis ekenin basa aıtqan bolatyn.

I.Adyrbekov óz sózinde Túr­kistan qalasynyń túrki áleminiń rýhanı astanasy retindegi bede­liniń arta túskenin, bıylǵy 6 mamyrda Túrki memleketteriniń Bas múftıleri osy rýhanı ordada bas qosyp, turaqty keńes qurǵanyn aqsaqaldarǵa jet­kizdi.

El astanasynda ornalasqan Ha­lyq­aralyq Túrki akademııasy «Ortaq túrk tarıhy», «Ortaq túrk ádebıeti» jáne «Túrki áleminiń geo­gra­­fııasy» oqýlyqtaryn túrki mem­leketteri mektepteriniń oqý baǵdar­la­masyna engizýdi usyn­dy. Osy máseleni Aqsaqaldar keńesi Ys­tanbuldaǵy kezdesýde kóter­gen bolatyn. I.Adyrbekov atalǵan kitap­tardy Aqsaqaldar keńe­siniń múshe­lerine tartý etti.

Keńestiń jumysy barysynda aqsaqaldardy Qyrǵyzstan Pre­zıdenti Sadyr Japarov Ala-archa memlekettik rezıdensııasyn­da qa­byldap, ár aqsaqalmen jeke pikir almasty. О́z ke­zeginde Ikram Adyrbekov keıingi jyldary Qazaqstan men Qyr­­ǵyzstan ara­syndaǵy qarym-qaty­nas tyń leppen  qarqyn ala bas­taǵanyn, saý­da aınalymy eki esege deıin óskenin, bul eki eldiń memleket basshylarynyń ózara senim, yn­tymaqtastyq, syılastyq ornata bilýiniń nátıjesi ekenin atap ótti.

Prezıdent S.Japarov týys­qan elder arasyndaǵy saýda-ekonomıkalyq áleýet óte joǵary ekenin, Pre­zıdent Q.Toqaevpen shekara aı­maǵyna saýda-logıs­tıkalyq orta­lyqtar qurýǵa kelis­kenin, sonymen qatar Almaty men Ystyqkóldi toǵystyratyn tike­leı joldy birlesip iske qosýdy qolǵa alatynyn aıtty. Osy másele oıdaǵydaı sheshilse, qazaqstandyq demalýshylardyń sany birneshe ese ósetinine senimdi ekenin jet­kizdi.

Aqsaqaldar keńesi jumys qo­ry­tyndysyna saı arnaıy qujat qabyldady. Qujatta 11 qarasha kúni Samarqandta ótetin túrki mem­le­­ket­teri basshylarynyń sam­mıtine naqty usynystar belgi­lengen.