ASTANA. 7 mamyr. «Egemen Qazaqstan» gazetiniń Pavlodar oblysyndaǵy menshikti tilshisi Farıda Byqaıdyń tikeleı aralasýy arqasynda óńirdiń Ertis aýdany ortalyǵyna budan shamaly ýaqyt buryn ornatylǵan tanktiń ornyna kúsh atasy – Qajymuqannyń nemese elimiz táýelsizdiginiń nyshany – Baıterektiń eskertkishi qoıylatyn boldy. Bul týraly egemen.kz tilshisi habarlady.
Máseleniń mánisi mynada. Gazetimizdiń ústimizdegi jylǵy 24 qańtardaǵy №16 nómirinde Farıda Byqaıdyń «Turǵyndar ań-tań ... » degen zametkasy jarııalandy. Onda avtor Ertis aýdandyq ákimdiginiń aldynda turǵan Lenın eskertkishi alynyp, onyń orynyna tank qoıylǵanyn ashyna jazǵan bolatyn. Tilshi«sup-sur susty temirdi emes, rámizderimizdiń qurmetteıtin» ýaqyttyń jetkenin ashyp aıtyp edi.
Arada birqatar ýaqyt ótkennen keıin oblys ákiminiń baspasóz qyzmeti tilshige habarlasyp, onyń joǵaryda atalǵan maqalasynda kóterilgen jaıttarǵa baılanysty atqarylǵan jumystardyń jaıyn habarlapty.
«О́tken jyly aýdan ortalyǵy - Ertis aýylynyń ortalyq alańy men alleıasyn jańǵyrtý boıynsha jobalyq-qujattamalar ázirlendi, - delingen onda. - Aýdannyń ortalyq alańy men alleıasyn jańǵyrtý boıynsha arnaıy jınalys ótti. Bul jınalysqa jergilikti atqarýshy bılik ókilderi, aýdandyq máslıhat depýtattary, aýdannyń qurmetti azamattary, zeınetkerler qatysty. Jınalysta «Lenın eskertkishin basqa jerge kóshirý týraly» sheshim qabyldandy. Qazir tańda Lenın eskertkishiniń ornyna BMP (tank) eskertkishi ornatylǵan. Bul tank eskertkishi aýdandyq ákimdiktiń aldynda ýaqytsha qoıyldy. Qazirgi tańda BMP-nyń ornyna Qajymuqan nemese Báıterek eskertkishin ornatý boıynsha qarjylandyrý máselesi sheshilip jatyr».
«Qurmetti Farıda Shaımardanqyzy! Siz kótergen taqyryp jáne oǵan qatysty aıtylǵan syn óte obektıvti ári oryndy dep bilemiz. Aldaǵy ýaqytta Sizben tyǵyz qarym-qatynasta jumys jasaımyz dep senemiz», - dep jazady Pavlodar oblysy ákiminiń baspasóz qyzmeti.
Murat Aıtqoja.
Derekkóz: egemen.kz.
Foto: photoua.narod.ru.