Atyraý oblystyq bilim basqarmasy basshysynyń mindetin atqarýshy Aınagúl Dúısekenovanyń málimetinshe, jańa oqý jylynda 200 mektepte alǵashqy qońyraý soǵylady. Bilim ordalaryndaǵy sabaqqa 138 myńnan astam oqýshy keledi.
– О́ńirdiń áleýmettik-ekonomıkalyq damý josparyna sáıkes, 2025 jylǵa deıin 48 jańa mekteptiń ǵımaraty kezeń-kezeńimen paıdalanýǵa beriledi. Bıylǵy jańa oqý jylynda úsh mektepti paıdalanýǵa berý josparlanyp otyr. Qazir barlyq mektepte jóndeý jumystary aıaqtaldy. Jańa oqý jyly dástúrli formatta bastalady, – deıdi A.Dúısekenova.
Onyń aıtýynsha, Atyraý qalasyndaǵy 63 mekteptiń jóndeý jumystaryna 69,5 mln teńge bólingen. Kúzgi-qysqy kezeńge daıyndyq kezinde ortalyq jylý qazandyǵyna qosylǵan 27 mekteptiń jylý júıesi gıdravlıkalyq synaqtan ótkizilgen. Al 36 mekteptiń jylý qazandyǵy jylytý maýsymyna tolyq daıyndalǵan.
Oblystyq qurylys basqarmasy basshysynyń mindetin atqarýshy Nurbergen Qusaıynovtyń deregine súıensek, bıyl jańadan bes mekteptiń qurylysy bastalady. Oǵan respýblıkalyq bıýdjetten qarjy bólinip otyr.
– Byltyr tórt mekteptiń qurylysy aıaqtaldy. Atap aıtqanda, Qyzylqoǵa aýdanynyń Muqyr aýylynda – 424 oryndyq, Jylyoı aýdanynyń ortalyǵy Qulsary qalasynda – 580 oryndyq, Atyraý qalasyndaǵy «Bereke» shaǵyn aýdanynda 1 200 oryndyq orta mektep paıdalanýǵa berildi. Sonymen qatar Inder aýdanynyń ortalyǵy Inderbor kentindegi Kóktem orta mektebine 80 oryndyq japsarjaı salyndy. Al bıyl respýblıkalyq bıýdjet esebinen bólingen qarjyǵa Atyraý qalasynda árqaısysy 600 oryndyq tórt mektep pen Inder aýdanynda 300 oryndyq mektep-ınternattyń qurylysyn bastaý kózdelip otyr, – deıdi N.Qusaıynov.
Qazir Atyraý qalasy men Jylyoı, Inder, Mahambet, Isataı aýdandarynda 7 mekteptiń qurylysy júrip jatyr.
Atyraý oblysy