Semeıde XXIII respýblıkalyq Abaı oqýlary baıqaýynyń jalaýy jelbiredi. Uly shaıyrdyń murasyn nasıhattaýǵa arnalǵan baıqaýda elimizdiń úzdik mektep oqýshylary shyǵarmashylyq qarym-qabiletterin tanytatyn bolady.
Jıyrma jyldan beri úzilmeı ótkizilip kele jatqan rýhanı doda bıyl da aýqymdy deńgeıde ótedi dep kózdelip otyr. Aıtalyq, osy joly Qazaqstannyń túkpir-túkpirinen jınalǵan 130-dan asa jas óren uly aqynnyń muralaryn nasıhattap, ózara kil myqtyny anyqtaıtyn bolady.
Atalǵan is-shara dástúrge sáıkes Abaı eskertkishine gúl shoqtaryn qoıyp taǵzym etýden bastalyp, qaladaǵy mádenı oryndarǵa ekskýrsııalyq saparmen jalǵasty. Onyń barysynda balalar Semeıdiń tarıhyna qatysty qundy derekterge qanyǵyp, sáýlet eskertkishterin kórýge múmkinik aldy.
«Abaı men Shákárimniń shyǵarmashylyǵy jastardy adamgershilik qaǵıdalaryna, sondaı-aq óziniń jeke kózqarasy qalyptasqan tulǵa retinde jetilip damýyna septesetini sózsiz. Jyl saıyn osy dástúrli baıqaýǵa qatysýǵa nıet bildirgenderdiń qatary artyp keledi. Bul bizdiń bolashaǵymyz úshin úlken jetistik dep oılaımyn.
Abaı – dana oıshyl, aqyn. О́ziniń ádebı muralary arqyly ol qanshama urpaqty tárbıelep, adam bolyp qalyptasýyna muryndyq boldy. Álbette, onyń qatarynda jerlesteri, ıaǵnı semeılikter de bar. Uly oıshyldyń parasattylyǵy, dúnıetanymy, jaqyndaryna degen meıirimdiligi búkil álemge aıan. Osy qundylyqtardy jadymyzda saqtaý, demek Abaıdy umytpaý – bizdiń qasıetti paryzymyz», dedi Abaı oblysy ákiminiń orynbasary Shalqar Baıbekov.
Baıqaý qatysýshylary Abaıdyń Jıdebaıdaǵy memorıaldyq keshenine saparlap, onda óz ónerlerin ortaǵa salatyn bolady. Uly aqynnyń murajaıyn aralap, onyń ómirimen tereńirek tanysýǵa múmkindik alady.
Abaı oblysy