Elordadaǵy Ulttyq mýzeıde «Dástúr men ýaqyt» atty qazaq halqynyń sándik-qoldanbaly óner týyndylaryna arnalǵan kórme ótti.
Kórmege halqymyzdyń ǵasyrdan ǵasyrǵa jalǵasyp kele jatqan mádenıeti men salt-dástúrin beınelegen zergerlik buıymdar, kıiz basý, gobelen, keramıka jáne teri óńdeý sekildi san túrli ónerdi ıgergen Berik Álibaı, Zeınelhan Muhametjan, Serjan Bashırov sekildi jıyrmadan asa qazaqstandyq qoldanbaly óner sheberleriniń jumystary qoıyldy. Atalǵan sheberlerdiń qolynan shyqqan árbir buıym – ótken men búgingini sátti sabaqtastyra bilgen ulttyq boıaýymen erekshelenedi. Sonymen qatar gobelen sheberleriniń asqan sheberlik pen kórkem kompozısııada birlesip jasaǵan dástúrli «quraq» jáne kıiz úıdiń keregesin óńdeýge arnalǵan jumys ústeliniń ınstallıasııasy jurtshylyqtyń qyzyǵýshylyǵyn oıatty.
Mádenı is-sharanyń ashylýynda Ulttyq mýzeı dırektorynyń orynbasary Abaı Satybaldın kórmeniń mańyzyna toqtalyp, oǵan 180-ge jýyq týyndy usynylǵanyn aıtty.
«Ulttyq qolónerimiz sonaý kóshpeli kezeńnen bastap, búginge deıin óz ásemdigimen qoldanystan qalmaı kele jatqan asyl qazynamyz. О́ner sheberleriniń ár kezeńdegi túrli baǵytta bederlegen ǵajaıyp dúnıelerdiń mádenı-rýhanı keńistigimizdegi alǵan orny zor. Sondyqtan kórmege usynylǵan árbir týyndy kelýshilerdiń júreginen erekshe oryn alatynyna senimdimin», dese belgili tarıhshy ǵalym Shaızada Toqtabaeva álemdik mádenıettiń damýyna úles qosqan tarıhı jádigerlerimizdi ulttyq muramyz retinde saqtap qana qoımaı, ony urpaq sanasyna sińirip, keńinen nasıhattaý kerek ekendigin sóz etti.
Qysqasy, mýzeı tórinde sán qurǵan sándik-qoldanbaly óner týyndylary kórmeni tamashalaýǵa kelgenderdiń kóńilinen shyqty.