Vetnamnyń Hoshımın qalasynda parataekvondodan Azııanyń ashyq birinshiligi aıaqtaldy. Túrli jas erekshelikteri boıynsha ótken jarysta 15 memleketten kelgen 70-ke jýyq sportshy baq synady.
Jerlesterimizdiń arasynan Málik Muqashevtyń ónerine tánti boldyq. Batys Qazaqstan oblysynyń Bórli aýdanynda múmkindigi shekteýli jandardy jattyqtyratyn ol dúbirli dodalarǵa ózi de jıi qatysyp, elge únemi oljaly oralyp júr. Máselen, byltyr Túrkııada ótken álem chempıonatynda 80 kılo salmaqta synǵa túsken Málik jeńis tuǵyrynyń eń bıik satysyna kóterildi. Bul joly da taekvondoshy qarsylas shaq keltirmedi. Taǵy bir bas júlde tanymal sportshy Kámıla Dosmalovaǵa buıyrdy. Ol 57 kılo salmaqta top jardy.
Hoshımınde taǵy tórt sportshymyzdyń altyn alýyna jaqsy múmkindikteri boldy. Alaıda aqtyq synda utylǵan Nysanbek Aıdarbekov (58 kılo), Baýyrjan Kósherbaev (63 kılo), Nurlan Dombaev (80 kılo) jáne Nyshan О́miráli (+80 kılo) kúmis medaldi moıyndaryna ildi. Asa aýyr salmaqta aıqasqan Álisher Garıpollaev qolaǵa qol sozdy.
Jalpy esepte Iran men О́zbekstandy alǵa jibergen Qazaqstan quramasy úshinshi oryndy ıelendi. Al múmkindigi shekteýli jandarǵa arnalǵan Sporttyq daıarlaý ortalyǵynyń aǵa jattyqtyrýshysy Nurjan Esilbaev chempıonattyń qorytyndysy boıynsha eń úzdik bapkerge tıesili arnaıy syılyqty ıelendi.