Elimizde kásipkerlerdiń aryz-shaǵymdary jerde qalmaı, ár derek boıynsha jedel áreket etý úshin oblystyq, tipti aýdandyq deńgeıge deıingi prokýratýralarda Bıznesti qorǵaý jónindegi mobıldi toptar jumys isteıdi. Jyl basynan bergi 7 aıdyń ishinde osy toptarǵa 1,7 myńnan astam kásipker júgingen eken.
Bas prokýratýranyń baspasóz qyzmetiniń habarlaýynsha, mobıldi toptarǵa kelip túsken osynshama aryz-shaǵymnyń árbir tórtinshisinde zań buzýshylyq rastalǵan. Mysaly, Almaty oblysynda bilim berý organdary tarapynan 251 jekemenshik balabaqshany zańsyz tekserýge jol berilgen joq. Ádette, mundaı tekserýler memlekettik tapsyrysty oryndaý máseleleri boıynsha júrgiziledi. Al Qostanaı oblysynda prokýrorlardyń aralasýynan keıin NPO DSK JShS-nyń 15 qyzmetkerine jalaqy boıynsha 3,4 mln teńge mólsherinde 2 aılyq bereshek tólendi.
Jambyldyq prokýrorlar T.Rysqulov aýdanynyń Turǵyn úı-kommýnaldyq sharýashylyq bólimi basshysynyń áreketin tekserip, onyń kásipkerlerge memlekettik satyp alý salasyndaǵy 10 mln teńge somasyndaǵy kepildik jarnany qaıtarmaǵanyn anyqtaǵan. Osy faktini tekserý kezinde prokýrorlar bólim basshysynyń budan basqa 39 kásipkerge 40 mln teńgeden astam bereshegi baryn da áshkerelegen. Bul faktilerdi aýdandyq prokýratýra Qylmystyq kodekstiń 189-baby 4-bóliginiń 2-tarmaǵynda (senip tapsyrylǵan bóten múlikti ıemdený nemese ysyrap etý) kózdelgen qylmys belgileri boıynsha sotqa deıingi tergep-tekserýlerdiń biryńǵaı tiziliminde tirkegen.
Arnaıy prokýrorlar júrgizgen sotqa deıingi tergep-tekserý nátıjeleri boıynsha aýdandyq sottyń úkimimen kináli adam ómir boıy belgili bir laýazymdardy atqarý quqyǵynan, sondaı-aq 7 jylǵa bas bostandyǵynan aıyryldy. Al bıznes sýbektilerine keltirilgen zalal tolyq óteldi.
Mobıldik toptar sheshetin máselelerdiń aýqymy jeke jaǵdaılarmen shektelmeıdi, kóbine prokýrorlar quqyqtyq aktilerge ózgerister engizýdi talap etetin júıeli problemalarmen kúresedi. Al bul jumys «Atameken» Ulttyq kásipkerler palatasymen ózara tyǵyz is-qımylda júrgizilýde. Bas prokýratýranyń málimetine qaraǵanda, prokýratýra organdarynyń kómegimen bıznestiń 28 óńirlik problemasy naqty sheshimin tapqan.
Mysaly, Pavlodar jáne Mańǵystaý oblystarynda memlekettik organdardyń kommersııalyq nysandardy zańsyz tekserý tájirıbesi toqtatylsa, Shymkent qalasynda sharýa qojalyqtaryn sýarmaly sýmen qamtamasyz etý boıynsha sharalar qabyldandy. Al Jambyl óńirinde prokýrorlar qabyldaǵan sharalardyń arqasynda elektr jelileriniń tirekterin jalǵa alyp otyrǵan kásipkerlerden aqsha alynbaıtyn boldy.
Osy derekterdiń ózi-aq prokýrorlardyń ýákiletti organdardyń zańsyz tyıym salý jáne shekteý sharalaryn joıý jónindegi jańa quzyreti kásipkerlerdiń quqyqtaryn qorǵaýdaǵy tıimdi quralǵa aınalǵanyn aıǵaqtaı alady. Mysaly, Qostanaı oblysynyń prokýratýrasynyń salyq salasynda júrgizilgen taldaý qorytyndysy boıynsha 141 salyq tóleýshige banktik shottardyń zańsyz buǵattalǵanyn anyqtalǵan. Prokýratýranyń qaýlysymen tyıym salýlar keri qaıtaryldy.
Jalpy, jyl basynan beri kásipkerlik salasyndaǵy buzýshylyqtar boıynsha onyń ishinde Mobıldi toptardyń jumysy sheńberinde 893 qadaǵalaý aktisi engizilip, 143 myńnan astam bıznes sýbektisiniń quqyqtary qorǵalǵan. Bas prokýratýranyń málimetine qaraǵanda, 534 mln teńgeden astam qarjyǵa 5,9 myń ákimshilik jaza alyp tastalyp, 6,4 myńnan astam zańsyz tekserý men baqylaýdyń ózge de nysandarynyń joly kesildi. Sondaı-aq 1 139 tyıym salý-shekteý sharasy men memlekettik organdardyń 702 aktisiniń kúshi joıylsa, 669-dan astam adam jaýapkershilikke tartylǵan.
Esterińizge sala keteıik, kez kelgen kásipker óz quqyqtaryn buzý faktileri týraly prokýratýra organdaryna 115 (Call-ortalyq), 30-18-30 (Bas prokýratýranyń mobıldi toby) nómirleri nemese oblys prokýratýralarynyń saıttarynda kórsetilgen nómirler boıynsha habarlasa alady.