Qyzylordalyqtar úshin elektr energııasy alańdatarlyq máseleniń biri. Qalany jylýmen qamtyp otyrǵan ortalyq jarty ǵasyrdan beri toqtaýsyz jumys istep, ondaǵy elektr jelileriniń tozyǵy ábden jetip tur. Osynyń jolyn izdegen oblys ákimdigi men Energetıka mınıstrliginiń birikken jumysy nátıjesinde qalada quny 215 mlrd teńgeden asatyn jańa jylý elektr stansasy salynady. Saǵatyna 277 gekokalorııa jylý men 240 megavatt elektr energııasyn óndiredi dep josparlanyp otyrǵan energetıkalyq jobany Túrkııanyń «Aksa Enerdjı» kompanııasy júzege asyrady.
Bıylǵy mamyr aıynda Syr eline jasaǵan sapary barysynda Energetıka mınıstri Bolat Aqsholaqov elimizde buryn-sońdy jylý elektr ortalyǵyn sheteldik ınvestor kómegimen salý bolmaǵanyn, mundaı múmkindikke osy oblys alǵash bolyp qol jetkizip otyrǵanyn aıtqan edi. Jýyrda nysan qurylysyn júrgizetin kompanııa anyqtaldy. Oblys ákimi Nurlybek Nálibaev ınvestorlarmen kezdesip, jobany júzege asyrý máselelerin talqylady. Basqosýǵa «Aksa Enerdjı» kompanııasynyń Qazaqstandaǵy ókili Mustafa Kemal men Energetıka mınıstrliginiń Jańartylatyn energııa kózderin qoldaý jónindegi qarjy-esep aıyrysý ortalyǵynyń dırektory Gúljan Qalıjanqyzy qatysyp, taraptar arasynda ekijaqty kelisimshart jasaldy.
– Memleket basshysy Úkimettiń keńeıtilgen otyrysynda ońtústik óńirlerdi úzdiksiz elektr energııasymen qamtamasyz etý maqsatynda 3 jylda qýattylyǵy 1 myń megavatt manevrlik stansalar salýdy tapsyrǵan bolatyn. Osy baǵyttaǵy bastamamyzǵa qoldaý bildirgen salalyq mınıstrlik pen «Aksa Enerdjı» kompanııasy basshylyǵyna aımaq jurtynyń atynan alǵysymdy bildiremin. Mańyzdy jobanyń sapaly jáne ýaqtyly júzege asyrylýyna kúsh salamyz, – dedi oblys ákimi.
Túrik kompanııasynyń ókili Mustafa Kemal energetıkalyq qaýipsizdikti saqtaýǵa aıryqsha múmkindik beretin jańa nysan 2025 jyly el ıgiligine beriletinin atap ótti. «Aksa Enerdjı» mazýt, tabıǵı gaz, jel generatorlary men sý elektr stansalary arqyly elektr energııasyn óndirýden álemdik tájirıbesi mol, jetekshi kompanııalardyń biri. Osyǵan deıin Afrıka men TMD elderinde osyndaı nysandar salǵan «Aksa Enerdjı» Qyzylordadaǵy qurylysty bıyl jeltoqsan aıynda bastamaq.
Jıynda bıyl oblysta 23 áleýmettik nysannyń jylý qazandyǵy qaıta jańǵyrtylatyny, oǵan respýblıkalyq jáne oblystyq bıýdjetten 676 mln teńge bólingendigi aıtyldy.
Qyzylorda oblysy