Jýyrda almatylyq kardıohırýrgter sırek kezdesetin keselmen týǵan 4 jasar qyzǵa kúrdeli operasııa jasady. Bul operasııa Perınatologııa jáne balalar kardıohırýrgııasy ortalyǵynda mindetti áleýmettik medısınalyq saqtandyrý esebinen júzege asty.
Aıta ketý kerek, kishkentaı pasıent týabitti júrek kemistigimen dúnıege kelgendikten, týǵan kezinde birden qos qolqa doǵasyna operasııa jasalǵan eken. Bul joly qala dárigerleri 4 jastaǵy naýqas sırek kezdesetin Lobrı-Pessı sındromyna shaldyqqandyqtan, ekinshi ret hırýrgııalyq operasııa jasaýǵa sheshim qabyldady. Lobrı-Pessı sındromy dep otyrǵanymyz – qarynshalyq perde aqaýynyń aorta qaqpaqshasynyń jetkiliksizdigimen úılesken týabitti júrek kemistigi. «Operasııa kezinde júrektiń kólemi edáýir úlkeıip, keńeıip ketkeni belgili boldy. Operasııa barysynda júrek toqtatylyp, jasandy qan aınalym apparaty paıdalanyldy», deıdi kardıohırýrg Abaı Surtaı.
Dárigerdiń aıtýynsha, aorta qaqpaǵyna jaqyn ornalasqan kemistikti túzetý asa qıynǵa soqqan. Degenmen operasııa sátti ótti, búginde baldyrǵan bólimshege aýystyryldy.
Perınatologııa jáne balalar kardıohırýrgııasy ortalyǵynda MÁMS paketine kiretin joǵary tehnologııalyq operasııalardyń júrek almastyrýdan basqa barlyq túri jasalatynyn atap ótken jón. Jyl basynan beri ortalyq kardıologteri 100-den astam operasııa jasasa, olardyń arasynda bir jasqa tolmaǵan 55 sábı bar.
Almatyda jańa týǵan nárestelerdiń ólim-jitimi joǵary bolǵandyqtan, Perınatologııa jáne balalar kardıohırýrgııasy ortalyǵyna tamyz aıynda qala ákimi Erbolat Dosaev arnaıy barǵan bolatyn. Jyl saıyn ortalyqta 12 myńnan astam medısınalyq kómek kórsetiledi, mamandar joǵary qaýiptilik sanatyndaǵy 9 myńnan pasıentti bosandyrady. Bul sanatqa salmaǵy óte az, týa bitken júrek aýytqýlary men basqa patologııalary bar balalar jatady. Ortalyqta balalardy kútetin jáne orta eseppen jylyna 150-200 kardıohırýrgııalyq operasııa jasaıtyn bilikti kadrlar bar.
Alaıda ortalyqtyń qoldanystaǵy ınfraqurylymy, ásirese operasııalyq-reanımasııalyq bólimsheleri men emhanasy kúrdeli jóndeý men jańǵyrtýdy talap etedi. Operasııalyq bólmelerde jeldetý júıesi múldem istemeıdi. Jylytý júıelerin, káriz qubyrlaryn, shatyr, lıftilerdi jóndeý men aýystyrýǵa týra keledi.
Qala ákimi Erbolat Dosaev qoǵamdyq densaýlyq saqtaý basqarmasyna qalanyń qurylys basqarmasymen birlesip, 2023 jyly qurylys-montaj jumystaryna kirisý maqsatynda osy máselelerdi keshendi sheshý úshin qajetti qarajatty qarastyrý men jobalaý jumystaryn júrgizýdi tapsyrdy.
ALMATY