Bıyl AQSh, Eýropanyń birqatar elinde tirkelgen orman órtteriniń sany ótken jyldarmen salystyrǵanda edáýir artqan. Apattyń basty sebebi – qurǵaqshylyq. Demalys kúnderi Qostanaı oblysy ormannan shyqqan qyzyl jalynmen kúresse, AQSh-tyń Soltústik Kalıfornııa shtaty da eki ormannan shyqqan tilsiz jaýdy aýyzdyqtady.
AQSh telearnalary habarlaǵandaı, ormanǵa jaqyn aýyl turǵyndary birden qaýipsiz jerge kóshirilgen. Sıskııý aýdanynyń shtat gýbernatory Gevın Nıýom aýyldyq okrýgte tótenshe jaǵdaı jarııalap, órt saldarynan birneshe turǵynnyń zardap shekkenin málimdedi. «Olar qazir jaqyn mańdaǵy aýrýhanada em-dom qabyldap jatyr», dedi shtat basshysy. Tilsiz jaý 4 myń gektarǵa jýyq aýmaqty qyzyl jalynǵa oraǵan. Senbi kúni órt 20 paıyzǵa evakýasııalanǵan. Qaýipsizdik qyzmetkerleri qajetti is-sharalar jalǵasyp jatqanyn aıtady.
Euronews telearnasynyń málimetinshe, bıyl Eýroodaq elderindegi orman órtteri rekordtyq kórsetkishke jetken – 700 myń gektar aýmaq. Eýropalyq orman órtiniń aqparattyq júıesiniń (EFFIS) derekteri boıynsha Ispanııa orman órtinen eń qatty zardap shekken, eldiń 283 000 gektardan astam jeri órtenip ketken. Odan keıin Rýmynııa (150 735), Portýgalııa (86 631), Fransııa (62 102) jáne Italııa (42 835) tur.
Mamandar sońǵy jyldary álemdegi órt sany kúrt óskenin aıtady. Máselen, tamyz aıynyń ortasynda dúnıe júzinde 2 300-den astam órt tirkelgen, bul 2006-2021 jyldarda tirkelgen 1 349 órt oqıǵasynyń ortasha kórsetkishinen birshama joǵary.
«Aýa temperatýrasynyń joǵarylaýy, klımattyń ózgerýi, qurǵaqshylyq jaılap, jaýyn-shashynnyń az túsýi orman órtteriniń basty sebebi bolyp tur», deıdi mamandar. Eýropalyq Komıssııanyń Birlesken zertteý ortalyǵy bul sońǵy 500 jyldaǵy órttiń eń joǵarǵy kórsetkishi ekenin málimdedi.