Shymkent qalasynda medısına áleýeti jyldan-jylǵa artyp keledi. Sonyń bir aıǵaǵy buryn tek respýblıkalyq ortalyqtarda jasalatyn kúrdeli operasııalar endi elimizdiń úshinshi megapolısinde de qolǵa alyna bastady. Medısına salasynda aıtýǵa turarlyq sońǵy jaǵymdy jańalyqtyń biri – qalalyq №1 klınıkalyq aýrýhanasynda zamanaýı angıografııalyq operasııa jasaý bólmesiniń ashylýy. Osynaý jańa qondyrǵy arqyly dárigerler sapaly dıagnostıkalyq tekserýler júrgize alady jáne sonymen birge kúrdeli operasııalar jasaý múmkindigi de arta túspek.
Aıta ketý kerek, atalǵan zamanaýı dıagnostıkalyq kabınettiń ashylý saltanatyna Ulttyq neırohırýrgııa ortalyǵynyń prezıdenti Serik Aqsholaqovtyń ózi kelip qatysty.
Resmı derekterge súıensek, Shymkent qalasynda sońǵy 3 jylda medısınalyq uıymdardyń materıaldyq tehnıkalyq bazasyn nyǵaıtýǵa 13,9 mlrd teńge qarajat bólingen. Al qajetti qural-jabdyqtarmen qamtý kórsetkishi 79,2 paıyzǵa jetken. Buǵan deıin atalǵan angıografııalyq apparat qalalyq №2 aýrýhanaǵa, qalalyq klınıkalyq balalar aýrýhanasyna jáne onkologııalyq ortalyqqa ornatylǵan edi. Osylaısha, megapolıste halyqqa joǵary mamandandyrylǵan medısınalyq kómektiń qoljetimdiligi birshama arta tústi. Osyndaı zamanaýı apparattardyń kómegimen medısına qyzmetkerleri ózderine júktelgen mindetti abyroımen atqaryp keledi.
Endi jańa apparat arqyly qalalyq №1klınıkalyq aýrýhanada bas mı tamyryna, bastaǵy isikke jáne ınsýlt alǵan naýqastarǵa joǵary tehnologııalyq operasııalar jasalady. О́z kezeginde jańa angıografııalyq qondyrǵy osy apparattyń sońǵy úlgisi bolyp sanalady, al baǵasyna kelsek, onyń quny 1 mlrd teńgege jýyqtaıdy. Bul medısınalyq quraldyń bir ereksheligi, eki detektordy bir ýaqytta qoldaný arqyly neırohırýrgııalyq jáne ıntervensııalyq operasııalardy jasaýǵa, tamyrlardy 3D keskininde tekserýge, operasııanyń barysynda kompıýterlik tomografııa jasaýǵa múmkindik beredi, deıdi mamandar. Sonymen qatar atalǵan klınıkada elimizdiń respýblıkalyq medısınalyq ortalyqtary men shetel mamandaryn tarta otyryp, onlaın sheberlik saǵattaryn ótkizý josparda bar. Tek qalanyń ǵana emes, megapolıske jaqyn aýyl-aımaqtyń naýqastaryna da medısınalyq kómek kórsetýdiń múmkindigi týyp otyr.
Budan bólek, megapolıs medısınasyna qatysty taǵy bir aıryqsha atap óterlik oqıǵanyń biri – Shymkentten ashylǵan erekshe balalarǵa arnalǵan mamandandyrylǵan stomatologııalyq kabıneti.
Bul kabınette dárigerler serebraldy sal aýrýyna shaldyqqan jáne basqa da múmkindigi shekteýli balalardyń aýyz qýysy men tisin arnaıy ádispen nemese narkoz berý arqyly jeńil túrde emdeıdi.
О́z kezeginde Asar shaǵyn aýdanyndaǵy balalar aýrýhanasynan ashylǵan stomatologııalyq kabınette de aq jeleńdi mamandar kishkentaı naýqastardy tegin qabyldaıdy. Ol úshin pasıent jergilikti emhanadan joldama alyp kelýi qajet. Stomatologııalyq kabınette tisti emdeýmen qatar aýyz qýysyna dıagnostıkalyq tekserý júrgizilip, tıisti em-dom taǵaıyndalady. Kabınet rentgen, narkoz apparaty syndy qajetti jabdyqtarmen qamtamasyz etilgen.
Osy taqyrypqa qatysty taǵy bir tyń jańalyq – Shymkent qalalyq stomatologııalyq emhanasynda túngi ýaqytta da qyzmet kórsetetin kabınetter sany ósip keledi. Onda tis dárigerleri kúndiz jáne keshki 20:00-den tańǵy 08.00-ge deıin túngi aýysymmen jumys isteıdi.
Kúndiz balalarǵa 17 terapevtik jáne 4 hırýrgııalyq kabınette qyzmet kórsetilse, túngi aýysymda 3 dáriger men 2 medbıke tisi aýyrǵan naýqastardy qabyldaıdy.
Emhana dárigerleriniń aıtýynsha, túngi aýysymda bir kúnde orta eseppen 17-25 bala em alýǵa keledi eken. Al kúndiz bala sany 500-600-ge deıin barady. Buǵan deıin tek bir kabınet jumys istep kelgen. Sodan emdelýshiler uzaq ýaqyt kezekke turýǵa májbúr bolǵan. Atalǵan kemshilikti joıý maqsatynda Shymkent qalalyq densaýlyq saqtaý basqarmasy tarapynan naqty shara qolǵa alynyp, sonyń nátıjesinde túngi aýysymda jumys isteıtin qosymsha eki kabınet iske qosyldy.
ShYMKENT