Soltústik Qazaqstan oblysynyń polıseıleri 1,5 mıllıon teńgege jýyq astyq urlyǵynyń jolyn kesti, dep habarlaıdy Egemen.kz.
Esil aýdanynda dala jolyndaǵy mobıldi toptardyń biri ormanǵa kirgen KamAZ kóliginiń izin baıqaǵan. Tártip saqshylary jaqyn jerde ornalasqan JShS jumysshylarynyń izin tekserip, aǵashtardyń artynda shópke túsirilgen jańa eginniń dánin tapty. Shaqyrý boıynsha kelgen jedel-tergeý toby kásiporynnyń 39 jastaǵy qyzmetkeriniń qatysy baryn anyqtady.
Atalǵan fakti QR Qylmystyq kodeksiniń 188-baby «Urlyq» boıynsha sotqa deıingi tergep-tekserýdiń biryńǵaı tizilimine engizilgen. Oqıǵa ornynan jalpy quny 1,4 mıllıon teńgeden asatyn 12 tonna 260 keli bıdaı tárkilenip, ıesine qaıtaryldy.
«Ieleri qabyldaǵan qaýipsizdik sharalary qylmysty jedel ashýǵa yqpal etti. Alqaptaǵy astyq pen astyq saqtaıtyn toktardaǵy qatań esepten basqa, kásiporyn kúzetpen qamtamasyz etilgenin, sıgnalızasııa jáne beınebaqylaýmen jabdyqtalǵanyn atap ótken jón. Aıta ketetin bolsaq, aýylda kásipker qoǵamdyq oryndarǵa 5 kamera ornatqan, ol ýchaskelik polısııa pýnktine qosylǵan», deıdi aýdandyq ishki ister bóliminiń basshysy Erlik Eslıambekov.
Búkil oblys boıynsha polısııa qyzmetkerleri aýyl sharýashylyǵy taýaryn óndirýshilerge óz nysandarynyń tehnıkalyq beriktigin qamtamasyz etýdi, kúzet júıesin jetildirýdi usynady – bul urlyq faktileriniń aldyn alýǵa jáne jedel ashýǵa yqpal etedi. 20 tamyzdan bastap «Astyq» JPISh iske qosylǵannan beri oblysta 5 qylmys tirkelip, onyń 4-i ashyldy.