Qazaqstan men Reseı arasyndaǵy dıplomatııalyq qatynastardyń ornaǵanyna 30 jyl tolýyna arnalǵan merekelik is-sharalar Astrahan memlekettik opera jáne balet teatrynda úlken merekelik konsertpen bastalyp, basqa qalalarda jalǵasty, dep habarlaıdy Egemen.kz.
Áýeli 7 qyrkúıekte «Qazan Halyqaralyq musylman kınosy festıvali» aıasynda qazaqstandyq fılmderdiń kórsetilimi uıymdastyryldy. Onda rejısser Iýlııa Zaharovanyń «Tarlan» fılminiń tusaýkeseri ótti. Bul kartına Ǵalymjan Ibragımovtyń «Almachýar» povesiniń jelisimen túsirilgen «Tatarkıno» jáne Almapictures birlesken jobasy.
Baıqaýǵa sondaı-aq rejısser Adaı Ábeldınovtiń tolyqmetrajdy tarıhı anımasııalyq «Kúltegin» fılmi usynyldy. Taspa kóptegen kóshpeli etnostardy bir týdyń astyna biriktirgen Túrki qaǵanatynyń belgili áskerı qolbasshysy Kúlteginniń jas kezi týraly baıandaıdy. Festıval aıasynda «Orystar Marıenplasta» atty dramalyq fılmi de kórsetildi.
Brıtandyq kınorejısser jáne ssenarıst Djessı Djonsonnyń «Ave Marııa» fılmin Qazanda prodıýser Erken Iаlgashev tanystyrdy. Qazandyq kórermen úshin taǵy bir tartý - Generation14Plus baǵdarlamasynda Berlın kınofestıvaliniń Gran-prıin jeńip alǵan Farhat Sháripovtyń «Shema» fılminiń kórsetilimi ótti. Bul sensasııalyq «18 kılogers» fılm trılogııasynyń ekinshi bólimi.
Sol sııaqty Musa Jálel atyndaǵy Tatar memlekettik akademııalyq opera jáne balet teatrynda Qazaqstan Respýblıkasy óner sheberleriniń gala-konserti ótti. Konsertke Qurmanǵazy atyndaǵy Qazaq ulttyq halyq aspaptar orkestri, Qazaqstannyń halyq artısteri Seken Turysbekov, Aıgúl Úlkenbaeva, Qazaqstannyń eńbek sińirgen qaıratkerleri Saltanat Ahmetova, Batyrjan Myqtybaev jáne basqa da elimizdiń tanymal ánshileri men shyǵarmashylyq ujymdary qatysty. Konsert bastalar aldynda Elabýga memlekettik tarıhı-sáýlet jáne sáýlet óneri qorynan alynǵan qazaqstandyq sýretshilerdiń sýret kórmesi uıymdastyryldy.