Ortalyq kommýnıkasııalar alańynda ótken brıfıngte Ulttyq ekonomıka mınıstrligi Joldaýda aıtylǵan áleýmettik-ekonomıkalyq máselelerdiń qalaı júzege asyrylatyny jóninde málimdedi. Bul maqsatta quzyrly organ jańa ekonomıkalyq saıasat, naqty sektordy damytý, memlekettik basqarýdy jańǵyrtý sekildi úsh baǵyt boıynsha jospar quryp, iske kiriskenin habarlady.
Qazirgi tańda Ulttyq ekonomıka mınıstrligi «Ulttyq qor – balalarǵa» jobasyn Ulttyq qormen birlesip iske asyrý tetikterin pysyqtap jatyr. Aldymen 18 jasqa deıingi barlyq balalarǵa derbes jınaqtaýshy shot ashylady. 2024 jyldan bastap jyl saıyn qordyń ınvestısııalyq kirisiniń jartysynan túsken qarajat ár balanyń shotyna aýdarylyp otyrady. Tólem mehanızmi búginde qosymsha eseptelip jatqanyn aıtqan Ulttyq ekonomıka mınıstri Álibek Qýantyrov qordyń ınvestısııalyq sheshimi kommersııalyq maqsattylyq, uzaq merzimdi múddeler jáne negizgi krıterıı tıimdilik qaǵıdattaryna negizdeletinin alǵa tartty.
«Memleket basshysynyń tapsyrmasyn eskere otyryp, qordyń ınvestısııalyq jobalary men aktıvteriniń portfelin qaıta qaraý, onyń ishinde olarǵa synı baǵalaý júrgizý qajet. Basymdyqtardy belgileý jáne aktıvter men jobalardyń ońtaıly portfelin qalyptastyrý, onyń ishinde ınvestısııalardy jekeshelendirý, resýrstardy bosatý jáne qaıta bólý tetigi arqyly qalyptastyrý boljanýda. El, óńir, sala úshin strategııalyq mańyzy bar, onyń ishinde ınfraqurylymdy jańǵyrtýǵa, jańa salalar men joǵary tehnologııalyq óndiristerdi qurýǵa baǵyttalǵan ınvestısııalyq jobalarǵa basymdyq beriledi», dedi mınıstr.
Sondaı-aq 2030 jylǵa deıingi salyq saıasatynyń negizgi tujyrymdamasyn ázirleý boıynsha jumys júrgizilip jatyr. Bul týraly Álibek Qýantyrov: «Prezıdent qoıǵan jańa mindetter bıýdjettik josparlaýdy bıýrokratııadan aryltýǵa jáne bıýdjetaralyq qatynastardy jetildirýge baılanysty jumystyń qısyndy jalǵasy bolady. Sondyqtan memlekettik qarjyny basqarý tujyrymdamasynyń erejelerin jáne basqa da ózekti máselelerdi qamtıtyn jańa Bıýdjet kodeksin ázirleý tıimdi jáne únemdi bıýdjet saıasatyn qamtamasyz etýge jańa serpin beredi. Jańa Salyq jáne Bıýdjet kodeksterin ázirleý, qoǵammen birlesip jáne sarapshylardyń bıznes qoǵamdastyq ókilderiniń qatysýymen júrgiziletin bolady», dedi.
Infografıkany jasaǵan Amangeldi Qııas, «EQ»
«О́ńirlerdegi mańyzdy máselelerdi jedel sheshý úshin ókiletti mekemeler keńeıtiledi», dep málimdedi mınıstr. «Bul sharalar memlekettik basqarýdyń servıstik jáne «adamǵa baǵdarlanǵan» modelin qurýǵa múmkindik beredi. Prezıdent Joldaýda áleýmettik-ekonomıkalyq saıasatymyzdyń negizgi maqsaty azamattardyń ál-aýqatyn sapaly jáne ınklıýzıvti arttyrý ekenin atap ótti. Jeke kásipkerlik bastamany yntalandyrý, básekelestikti damytý, ulttyq tabysty ádil bólý basymdyqtar retinde belgilendi. Bilim berý jáne densaýlyq saqtaý júıeleri arqyly azamattarǵa ınvestısııa salatyn jáne neǵurlym osal áleýmettik toptarǵa qoldaý kórsete otyryp, barlyǵy úshin teń múmkindikterdi qamtamasyz etetin ekonomıkalyq damýdyń ashyq jáne boljamdy modeli qurylady», dedi Á.Qýantyrov.
Al sán-saltanat salyǵynan túsetin qarjy shamamen 8 mlrd teńgeni quramaq. Bul salyq negizinen kóliktiń qymbat túrine salynady. Sondaı-aq ıahta, shetelde vıllasy, jeke ushaǵy bar baı-manaptar da sáıkesinshe jyl saıyn salyq tólep, qazyna qoryn tolyqtyrmaq.