Elordada kúmbez túrindegi «О́mir aǵashy» monýmenti salynyp jatqany belgili. Tamasha týyndy shahar tósinde jańadan qazyq qaqqan Beıbitshilik jáne kelisim saıabaǵynda oryn tepken. Elimizdegi túrli konfessııalar men ulttar arasyndaǵy yntymaqtastyqty, dostyq pen birlikti beıneleıtin joba Álemdik jáne dástúrli dinder sezi aıasynda qolǵa alynǵan bolatyn. Keshe sezd delegattary saıabaqta 60-tan astam aǵash otyrǵyzdy.
Eń áýeli Sezd Hatshylyǵynyń basshysy Máýlen Áshimbaev qurmetti meımandarǵa monýmenttiń mańyzdylyǵyn aıtyp berdi. Árbir din kóshbasshysy ekken aǵash álemdik rýhanııatqa egilgen bir tal shybyq bolyp sanalmaq. Erekshe saıabaq aldaǵy ýaqytta týrıster qyzyǵa keletin demalys ornyna aınalady dep kútilýde.
Búginde kúmbez túrindegi eskertkishtiń qańqasy daıyn eken. Onyń ortasyna japyraqty aǵash, emen otyrǵyzylǵan. Aǵash spıralmen jáne úılesimdi sýburqaqpen qorshalmaq. Avtor ıdeıasyna sáıkes, ǵasyrlar boıy tamyry tereńde jatqan sý men ómir aǵashy jer betindegi tirshiliktiń naqty beınesin aıshyqtaıdy. Osylaısha, ınstallıasııa barlyq konfessııalardyń kelisimge, beıbitshilik pen dostyqqa shaqyrýyn bildiredi. Kúmbez óz kezeginde bir aspan astyndaǵy álemdi beıneleıdi. Onda 4 negizgi núkteni – Ońtústik, Soltústik, Batys, Shyǵysty bildiretin 4 kirý aımaǵy bolmaq.
Kúmbez qabyrǵalarynda Dúnıeniń jaratylýyn, Qazaqstan tarıhyndaǵy oqıǵalardy kórsetetin beıneler, sondaı-aq qazirgi zamanǵa úndeý retinde elimizdiń aýmaǵynda tabylǵan áıgili ejelgi jartas sýretteri – petroglıfter salynady. Aǵashtyń aınalasyndaǵy spıral aspandy (kúmbezdi) jáne jerdi (sý betin) baılanystyrady, osylaısha álemniń náziktigi týraly ıdeıany jetkizedi.
Álemdik jáne dástúrli dinder lıderleriniń VII sezi delegattary aǵash egýge belsendi atsalysyp, óz oılaryn ortaǵa saldy.
– Sezd óte joǵary deńgeıde ótti. Dúnıe júzindegi túrli din ókilderiniń basyn biriktirgen is-sharanyń tatýlyqqa úndeıtini belgili. Sezd sheńberinde aǵash egý ıdeıasynyń nazarǵa alynǵany qýantady. Sebebi bul – beıbitshiliktiń rámizi. Súıikti paıǵambarymyzdyń (salaallahý ələıhı ýə səllam): «Kimde-kim bir aǵash otyrǵyzsa nemese bir nárse ekse jáne odan bir qus, bir adam nemese janýar jese, ol adam úshin sadaqa bolyp esepteledi», degen hadısi kóp nárseni ańǵartqandaı. Álemde beıbitshilik bolsyn! – dedi Qyrǵyzstan musylmandary dinı basqarmasynyń tóraǵasy Zamır Rakıev.