Elordada 28-29 qyrkúıekte Digital Bridge halyqaralyq tehnologııalyq forýmy aıasynda IT-vakansııalar jármeńkesi ótedi. EXPO kórme ortalyǵynyń alańynda halyqaralyq jáne qazaqstandyq IT-kompanııalar jumys izdeýshilerge aqparattyq tehnologııalar, Data science, blockchain salasy boıynsha 500-deı vakansııa usynady.
Sıfrlyq damý, ınnovasııalar jáne aeroǵarysh ónerkásibi mınıstrligi, sondaı-aq Astana qalasy ákimdigi jáne Astana Hub IT-startaptar halyqaralyq tehnoparki uıymdastyryp jatqan bul jármeńkede 20 shaqty kompanııa jumys izdeýshilerge joǵary tehnologııalar salasyndaǵy mansaptyq múmkindikter týraly aıtyp, uıymdary jaıly tolyqqandy aqparatpen bólisedi.
«Digital Bridge 2022 IT-vakansııalar jármeńkesi – HR-mamandar, IT-salasyndaǵy aldyńǵy qatarly halyqaralyq jáne qazaqstandyq rekrýterler bas qosyp, kásipqoılarǵa, frılanserler men jas mamandarǵa jumys ornyn usynatyn kareralyq múmkindikter alańy. Bul jerde árkim ózi maqsat etken qyzmetine qol jetkizip, armandaryn júzege asyra alady», deıdi Astana Hub atqarýshy keńsesiniń dırektory Danııa Ahmetova.
IT-vakansııalar jármeńkesi jumys ornyn aýystyrǵysy keletin kásipqoılarǵa, jańa jobalarǵa qatysqysy keletin frılanserlerge, jas mamandarǵa jáne JOO, baǵdarlamalaý mektepteriniń tájirıbe jınaǵysy keletin stýdentterine arnalǵan. Olar Epam, Sergek, Beeline, Kazdream, Documentolog, Tech Culture, UAT, Qazaqtelekom, Mytona, Freedom Finance, Halykbank, 2GIS, Coursera, KASPI, Huawei, Astana Hub jáne t.b. iri kompanııalardyń usynystaryn qarastyryp, jumysqa ornalasa alady.
Aıta ketý kerek, bul jármeńkege kompanııalar da, jumys izdeýshiler de tegin qatysa alady. Tek digitalbridge.kz saıty arqyly tirkeýden ótse jetkilikti.
«IT-ındýstrııasyndaǵy kadrlarǵa degen suranys kún saıyn artyp keledi, sondyqtan kompanııalarǵa únemi IT-mamandar qajet. Tek kásipqoılardy emes, áleýetti jas mamandardy da joǵary jalaqy jáne qolaıly jumys jaǵdaıymen qamtamasyz etýge daıyn. Bul oraıda IT-vakansııalar jármeńkesi jumys izdeýshilerge ǵana emes, jumys usynýshylarǵa da tıimdi. Mysaly, bıyl jazda ótken osyndaı jármeńkege qatysqan bizdiń kompanııa birneshe qyzmetker tapty, qazir olar bizde jaqsy jumys istep jatyr», deıdi Kazdream IT-kompanııasy bóliminiń basshysy Marııa Berejnaıa.
Eske salsaq, 28-29 qyrkúıekte elordada jyl saıynǵy Digital Bridge halyqaralyq tehnologııalyq forýmy ótedi. Bıylǵy forýmnyń taqyryby – «Central Eurasia as a new tech platform» – «Ortalyq Eýrazııa jańa tehnologııalyq platforma retinde qalyptasýda».