Isker toptarmen birqatar ekijaqty kezdesý aıaqtalǵannan keıin Memleket basshysy Qazaqstan-Amerıka ınvestısııalyq dóńgelek ústeliniń jumysyna qatysty, dep habarlaıdy Egemen.kz Prezıdenttiń baspasóz qyzmetine silteme jasap.
Is-sharaǵa Chevron, ExxonMobil, Fluor, Shell USA, The Solar Turbines, S&P Global, Centrus Energy Corporation, Boeing, Amway, GE International Markets, Honeywell UOP, Philip Morris, The Procter & Gamble Company, Baker Hughes, John Deere, Bechtel, Halliburton, Valmont, Champion Foods, PepsiCo, MasterCard, Citi, McLarty Associates, Macro-Advisory LTD, private equity fund RCF, Brownstein Hyatt Farber Schreck, Greenenberg Traurig LLP, Microsoft, Coursera, StartX, EPAM, Wabtec Corporation, Zscaler, DoorDash, Amazon, Pfizer, Medtronic, Netflix sekildi iri amerıkalyq kompanııalardyń basshylary qatysty.
Prezıdent mundaı formatta ótken kezdesý ıgi dástúrge aınalǵanyn atap ótip, osy sharany uıymdastyrýǵa atsalysqan AQSh-tyń Saýda palatasy men Iskerlik keńes múshelerine rızashylyǵyn bildirdi.
Memleket basshysy kezdesýde Ádiletti Qazaqstan qurýǵa baǵyttalǵan aýqymdy saıası jáne ekonomıkalyq reformalardyń júzege asyrylýy jóninde egjeı-tegjeıli aıtyp berdi.
Qasym-Jomart Toqaev Qazaqstannyń ekonomıkalyq áleýeti men ınvestısııalyq tartymdylyǵyn arttyrý úshin qabyldanyp jatqan sharalar týraly jan-jaqty málimet berdi. Atap aıtqanda, Prezıdent energetıka, aýyl sharýashylyǵy, ónerkásip, kólik-logıstıka, sıfrlandyrý, qarjy jáne jańartylatyn energııa kózderi salalaryndaǵy birlesken ınvestısııalyq jobalardy iske asyrý múmkindikterine toqtaldy. Memleket basshysy Qazaqstanda amerıkalyq jańa iri kásiporyndardyń paıda bolýyna qoldaý bildirdi.
Qasym-Jomart Toqaev Qazaqstan men AQSh arasyndaǵy strategııalyq ekonomıkalyq seriktestik barlyq salada ártaraptandyrylyp, keńeıe beretinin atap ótti.
«Meniń komandamnyń ınvestısııa tartýdaǵy tájirıbesi mol. Bul kompanııalaryńyzǵa aımaqtyń eń jyldam damyp kele jatqan ekonomıkalarynyń birinde bıznes júrgizýdi jeńildetedi. Búgingi kezdesý saýda-ekonomıkalyq jáne ınvestısııalyq yntymaqtastyqty ilgeriletýde, sondaı-aq Qazaqstan men AQSh arasyndaǵy strategııalyq seriktestikti odan ári nyǵaıtýda naqty qadam bolady dep senemin», dedi Qazaqstan Prezıdenti.