QR Premer-mınıstri Álıhan Smaıylovtyń Birikken Arab Ámirlikterine resmı sapary aıasynda QR Ǵylym jáne joǵary bilim mınıstrligi men Birikken Arab Ámirlikteriniń Bilim mınıstrligi arasynda joǵary jáne joǵary oqý ornynan keıingi bilim jáne ǵylym salasyndaǵy yntymaqtastyq týraly hattamaǵa qol qoıyldy, dep habarlaıdy Egemen.kz.
Delegasııa quramynda QR Ǵylym jáne joǵary bilim vıse-mınıstri Qýanysh Erǵalıev boldy.
Taraptar eki eldiń joǵary oqý oryndary arasyndaǵy áriptestik arqyly yntymaqtastyqty qoldaý, saparlarmen, tájirıbemen, joǵary jáne joǵary oqý ornynan keıingi bilimniń oqý josparlary men bilim berý júıelerimen almasý, sondaı-aq stýdentter men oqytýshylar almasý baǵdarlamalaryn yntalandyrý týraly ýaǵdalasty.
Sonymen qatar mınıstrlikterdiń ókilderi birlesken ǵylymı zertteýler júrgizýge jáne ǵylym salasynda tájirıbe almasýǵa kelisti.
«Bul Hattama Qazaqstan Respýblıkasy men Birikken Arab Ámirlikteri arasyndaǵy joǵary jáne joǵary oqý ornynan keıingi bilim berý men ǵylym salasyndaǵy ekijaqty qarym-qatynastardy odan ári damytýdyń jáne tyǵyz yntymaqtastyqtyń irgetasy bolmaq», dedi vıse-mınıstr Qýanysh Erǵalıev.
Kezdesý sońynda taraptar joǵary bilim men ǵylymdy damytýdyń ózekti máseleleri týraly pikir almasty.
Aıta ketsek, qazirgi ýaqytta Qazaqstannyń 4 joǵary oqý orny (L.N.Gýmılev atyndaǵy EUÝ, Ál-Farabı atyndaǵy QazUÝ, M.Qozybaev atyndaǵy SQMÝ, HBBK) men BAÁ 6 joǵary oqý orny (BAÁ ýnıversıteti, Halyqaralyq mádenı dıplomatııa ınstıtýty, Fýdjeıra ýnıversıteti, Dýbaıdaǵy amerıkalyq kolledj, amerıkalyq bilim berý ortalyǵy, amerıkalyq Ras Al Haıma ýnıversıteti) seriktestik qatynas ornatqan. Olar stýdentter men professor-oqytýshylyq quramynyń akademııalyq utqyrlyǵy, eki dıplomdy bilim berý baǵdarlamalary, birlesken bilim berý jáne ǵylymı jobalar júrgizý, professorlar men oqytýshylardyń biliktiligin arttyrý sheńberinde yntymaqtastyqqa qol jetkizgen.