Aldaǵy prezıdent saılaýy elimizdegi aýqymdy áleýmettik-ekonomıkalyq reformalardyń jańa kezeńine aınalýy tıis. Bul týraly Erlan Qarın óziniń Telegram arnasynda jazdy, dep habarlaıdy Egemen.kz.
«Memleket basshysynyń 20 qarashaǵa Prezıdent saılaýyn taǵaıyndaý týraly Jarlyǵy jańa saılaý sıklyn bastady.
Prezıdent saılaýyn ótkizý bastamasy sońǵy úsh jyldaǵy saıası qaıta qurýlardyń qısynyna tolyq sáıkes keledi. Konstıtýsııalyq reforma bılik tarmaqtary arasyndaǵy ózara is-qımyldyń jańa, teńgerimdi tártibin qamtamasyz etti. Al jańa úlgini iske qosý úshin búkil saıası júıeni, sonyń ishinde Prezıdent, Parlament, Úkimet, máslıhat sııaqty memlekettiń negizgi ınstıtýttaryn qaıta iske qosý qajet», dep jazdy E.Qarın.
Memlekettik hatshynyń aıtýy boıynsha, aldaǵy saılaý naýqany týraly pikirtalastar saıası ortada kópten beri júrip jatyr. Birqatar sarapshylar kóktemde kezekten tys saılaý ótkizýdi jaqtaǵan bolatyn.
Aǵymdaǵy saılaýdyń ereksheligi aldaǵy saılaý naýqandarynyń barlyq kestesin aldyn ala jarııalaý boldy.
«Prezıdenttik saılaýdy Qasym-Jomart Toqaev tıisti jarlyqqa qol qoıylǵanǵa deıin bir aıǵa jýyq ýaqyt buryn jarııalady, al buǵan deıin barlyq kezekten tys saılaýdy ótkizý kúni týraly jarlyqqa qol qoıylǵan bolatyn. Bul ýaqyt aldaǵy naýqandy keń qoǵamdyq talqylaýǵa ǵana emes, áleýetti qatysýshylardy aldyn ala daıyndaýǵa da jetkilikti boldy. Zań boıynsha saılaý taǵaıyndalǵan kúnnen bastap eki aı ishinde ótedi, biraq is júzinde búkil naýqan úsh aıǵa sozylady», dep túsindirdi E.Qarın.
Onyń aıtýy boıynsha, qoǵamnyń birtutastyǵy, memlekettiń turaqtylyǵy, eldiń kez kelgen ishki jáne syrtqy syn-qaterlerge laıyqty jaýap berý múmkindigi tek birqalypty jáne turaqty saıası júıe jaǵdaıynda ǵana qamtamasyz etiledi. Sondyqtan geostrategııalyq turaqsyzdyqtyń kúsheıýi jaǵdaıynda aldaǵy prezıdenttik saılaý elimizdi aýqymdy áleýmettik-ekonomıkalyq reformalardyń jańa kezeńi aldynda toptastyrýdyń mańyzdy faktoryna aınalýy tıis.