Iranda vıse-polısııa ustaǵan 22 jastaǵy Mahsa Amınıdiń ólimine baılanysty narazylyq sherýleri altynshy kún qatarynan jalǵasýda. Narazylyq aksııasy kezinde 31 adam qaza tapty, dep habarlaıdy Egemen.kz.
Irannyń 100-den astam qalasy men 30 provınsııasynda narazylyq sharalary ótip jatyr. Sherýshiler polısııa men úkimet ǵımarattaryn órtep jibergen. Tártip saqshylarynyń kópshilikke oq atqany jaıly habar da tarala bastady. Narazylyq kezinde bes polısııa qyzmetkeri qaza tapqan.
Elde mobıldi ınternet óshirildi. Irannyń Barlaý mınıstrligi keshe, 22 qyrkúıekte narazylyq sherýlerine qatysý zańsyz ekenin eskertti. Endi barlyq demonstranttar sotqa tartylatynyn aıtyp qorqytyp jatyr.
Aıta keteıik, eldegi tolqýlarǵa sebepshi bolǵan Mahsa Amını hıdjabty durys kımegen degen aıyppen ustalǵan. Irannyń qaýipsizdik kúshteri qyzdyń ýaqytsha ustaý ızolıatorynda júrek talmasynan esinen tanyp, qaıtys bolǵanyn aıtady. Al onyń týystary ólimdi soqqynyń kesirinen dep esepteıdi.
Osydan soń, Iran prezıdenti Ibrahım Raısı shuǵyl resmı tergeý júrgizýge buıryq berdi.