Qazaqstan shaıbaly hokkeıden 2027 jylǵy álem chempıonatyn ótkizýge resmı túrde usynys bildirdi. Bul aqparat atalǵan sport túri federasııasynyń saıtynda jarııalandy. Joǵarydaǵy jańalyqty jankúıerler jyly qabyldady.
Osydan birer kún buryn Qazaqstan Respýblıkasynyń Prezıdenti Qasym-Jomart Toqaev pen Halyqaralyq shaıbaly hokkeı federasııasynyń basshysy Lıýk Tardıf arasyndaǵy kezdesý barysynda osy taqyrypta keńinen áńgime qozǵalǵan edi. Sol kezde Memleket basshysy bizdiń elde sporttyń osy túrimen 14 myńnan asa adam aınalysatynyn tilge tıek ete kele, jer-jahannyń eń myqty komandalary bas qosatyn básekeni asa joǵary deńgeıde ótkize alatynymyz jaıynda málimdedi. Qazaqstannan bólek, bul jarysty qabyldaýǵa Germanııa men Norvegııa da nıet bildirip otyr.
О́tkenge zer salsaq, álemdik doda sonaý 1920 jyldan beri uıymdastyrylyp keledi. 85 márte jalaýy jelbiregen jarystyń deni Eýropa elderinde ótkeni belgili. Odan bólek, AQSh-ta úsh jáne Kanadada bir ret shymyldyǵy túrildi. Eger tańdaý Qazaqstanǵa tússe, onda shaıbaly hokkeıden osyndaı bási joǵary báseke Azııa qurlyǵynda alǵash ret uıymdastyrylmaq.
Qazaqstan quramasy álem chempıonattarynda 10 ret baq synady. Alǵash ret 1998 jyly Shvesııada boı kórsetsek, sońǵy ret bıyl Fınlıandııada baq synadyq. Eń úzdik kórsetkishke 2021 jyly Latvııada qol jetkizdik. Baltyq jaǵalaýyndaǵy jarysta 10-orynǵa taban tiredik. Sol chempıonat barysynda nebir azýly komandalarmen terezesi teń óner kórsetkenimiz jankúıerlerdiń jadynda.
Esterińizge sala keteıik, kelesi álem chempıonaty 2023 jyly Fınlıandııanyń Tampere men Latvııanyń Rıga qalarynda ótedi. 2024 jylǵy jarysty Chehııanyń Pragasy men Ostravasy qabyldaıdy. 2025 jylǵy dúbirli dodanyń jalaýy Shvesııanyń Stokgolmi men Danııanyń Hernınginde jelbireıdi. Al 2026 jylǵy birinshilik Shveısarııanyń Sıýrıhy men Frıbýrynda uıymdastyrylady.