Tennısten Qazaqstannyń birinshi, álemniń 44-raketkasy Aleksandr Býblık Fransııanyń Mets qalasynda ótken ATP 250 týrnıriniń fınalynda jeńilip qaldy.
Jerlesimiz halyqaralyq týrnırdiń fınalynda reıtıngte ózinen áldeqaıda tómen ornalasqan (65-oryn) ıtalııalyq Lorenso Sonegomen sheberlik baıqasty. Birinshi partııada tarazy basy ár set saıyn teńselip turǵanymen, taı-breıkte L.Sonegonyń joly boldy – 7:6 (7:3). Ekinshi sette qarqynyn arttyrǵan ıtalııalyq tennısshi aıqyn basymdyqpen jeńiske jetti – 6:2.
Eki saǵatqa jýyq jalǵasqan kezdesýde A.Býblık 7 eıs jasaǵanymen, 3 breık-poıntyn paıdalana almady. Qarsylasy 6 eıspen birge 2 breıkke qol jetkizdi. Osylaısha, Býblık ATP jarystaryndaǵy jetinshi fınalynda jeńilip qaldy. Ol bıyl bir týrnırde ǵana jeńiske jetti. Jyl basynda Monpelede ótken týrnırde bas júldeni oljalaǵan bolatyn.
Aleksandr Býblık fınaldaǵy jeńilisine qaramastan, kúni keshe jańarǵan álemdik reıtıngte 44-orynnan 41-orynǵa joǵarylady.