Reseıde ishinara mobılızasııa jarııalanǵannan keıin kórshi el azamattarynyń jappaı ózge elderge óte bastaǵany belgili. Sonyń ishinde basym bóligi Qazaqstan shekarasyn kesip ótti. Qazir elimizge kelgen reseılikterdiń sany jóninde túrli derek aıtylyp jatyr. Ishki ister mınıstrliginiń málimeti boıynsha, elimizge 200 myńnan astam RF azamaty kelgen. Osynshama adamnyń kelýi ishki naryqqa áser etpeı qoımaıdy. Biz ekinshi deńgeıli bankterge habarlasyp, tosyn mıgrasııanyń áseri jaıly suradyq.
«Altyn Bank» AQ baspasóz qyzmeti elimizdiń «Bank jáne bank qyzmeti týraly» zańyna sáıkes klıentter jáne olardyń bank ónimderine, aqsha aýdarymdary men tólemderi boıynsha bank operasııalaryna qatysty aqparattardy jarııalamaýǵa quqyly ekenin jetkizdi.
«Qazirgi ýaqytta «Altyn Bank» Qazaqstan Respýblıkasynyń rezıdent emes jeke tulǵalaryna bank shottaryn ashpaıdy. Bul sanatqa Qazaqstan Respýblıkasy aýmaǵynda qyzmet isteıtin, JSN bar jáne Qazaqstan Respýblıkasynyń zańnamasyna sáıkes salyq tóleıtin kompanııalarǵa resmı jumysqa ornalasqan shetel azamattary kirmeıdi. «Altyn Bank» Qazaqstan Respýblıkasynyń zańnamasyna jáne Ulttyq banktiń normatıvtik talaptaryna sáıkes sheteldik azamattarǵa tıisti tekserý júrgizýdiń barlyq talaptaryn oryndaıdy», delingen qarjy ınstıtýtynyń jaýabynda.
«Jusan Bank» baspasóz qyzmetiniń habarlaýynsha, Reseı Federasııasy azamattary tarapynan bank qyzmetine suranys túsip jatyr.
«Bank kartasyn ashý qajetti qujattardy tolyq tapsyrǵan kezde qoljetimdi. 24 aqpannan beri Reseı men Belarýs elinen kelgen 3 myńnan astam klıent tirkelip, 11 myńnan astam shot ashyldy. Bizdiń bankten shot ashý úshin belgili talaptar qoıylady. Sheteldik pasport, jumysqa ornalasýdy/oqýdy rastaıtyn qujat, JSN bar qujat, tirkeý týraly kýálik (kóshi-qon), Halyqqa qyzmet kórsetý ortalyǵynan ýaqytsha nemese turaqty tirkeýdi rastaıtyn anyqtama bolýy qajet. Bank halyqaralyq tólem júıelerimen túrli suraq boıynsha, onyń ishinde Reseı Federasııasynyń azamattary úshin kartalardy ashý máselesi boıynsha únemi baılanysta. Zań talaptaryn saqtaý, qyzmet kórsetý sapasyn arttyrý, alaıaqtyq áreketterge jol bermeý, baqylaý men monıtorıng sapasyn arttyrý boıynsha ekijaqty jumys júrgiziledi», delingen bank habarlamasynda.
Sondaı-aq bıyl naýryz aıynan bastap Reseı azamattarynyń kóp kelýine baılanysty rýblmen qolma-qol operasııalar aıtarlyqtaı artqan.
«Shetel valıýtasyn elden tysqary jerlerge shyǵarýǵa tyıym salýǵa baılanysty ekinshi deńgeıli bankterdiń kópshiliginde, onyń ishinde «Jusan Bank»-te de úlken kólemdegi qolma-qol rýbl jınaqtaldy. 2022 jyldyń shildesinde Ulttyq bank Reseı Federasııasyna qolma-qol rýbldi shyǵarýǵa ýaqytsha ruqsat berdi. Bul oryn alǵan jaǵdaıdy aıtarlyqtaı jaqsartýǵa kómektesti. Qazirgi ýaqytta qolma-qol rýbldiń úlken aǵyny baıqalmaıdy», deıdi bank baspasóz qyzmeti.
Bank ókilderiniń aıtýynsha, turýǵa yqtııarhat alǵan azamattardyń Qazaqstan Respýblıkasynyń basqa da azamattary sııaqty qarjylyq qyzmetterdi paıdalanýǵa múmkindikteri bar, ıaǵnı nesıe rásimdeýdi qospaǵanda, depozıtter ashýǵa, aýdarym operasııalaryn jáne seıftik depozıtarııdi paıdalanýǵa bolady. «Osyǵan baılanysty banktiń klıenttik bazasynyń artýy tranzaksııalyq bıznestiń ósýine ákeledi. Bul óz kezeginde naryqtyń barlyq qatysýshylaryna qyzyqty», dep jaýap berdi qarjy ınstıtýty.
Al jyl basynan beri «Jusan Bank»-ten Ýkraına azamattary 190-nan astam shot ashyp, 60-tan astam klıent tirkelgen.
Bizdiń saýaldarymyzǵa jaýap bergen «Nurbank» te qazirgi ýaqytta banktiń aıyrbastaý pýnkteri arqyly Reseı rýblin satýda ósim baıqalmaıtynyn aıtady.
«Alaıda 2022 jyldyń 21-28 qyrkúıegi aralyǵynda banktiń keıbir fılıaldarynyń kassasynda qolma-qol rýbl kólemi aldyńǵy aptamen (14.09-20.09) salystyrǵanda ortasha 21 paıyzǵa ósti. Kassalardaǵy qolma-qol rýbl kóleminiń ulǵaıýy halyqaralyq aqsha aýdarymdary sheńberinde aqshany qabyldaýǵa baılanysty boldy», delinedi bank jaýabynda.
О́z kezeginde bul qarjy ınstıtýty Reseı men Belarýs azamattaryna shot ashýda birneshe talap qoıady. Atap aıtqanda, jeke basyn kýálandyratyn qujat (shetel azamatynyń pasporty, azamattyǵy joq adamnyń kýáligi, eger beırezıdent qandas bolsa onda qandas kýáligi) nemese Qazaqstan Respýblıkasy ratıfıkasııalaǵan halyqaralyq shartqa sáıkes jeke basyn kýálandyratyn qujat dep tanylǵan ózge de qujat; klıenttiń salyq tóleýshi retinde tirkelý faktisin jáne jeke sáıkestendirý nómirin (JSN) berý faktisin rastaıtyn salyq organy bergen qujat; Qazaqstan Respýblıkasynda turaqty jáne ýaqytsha turýǵa ruqsat berilgenin rastaıtyn qujat.
Ishki ister mınıstri Marat Ahmetjanovtyń aıtýynsha, 3 qazannan beri Reseıden Qazaqstanǵa aǵylǵan kósh birshama saıabyrsyǵan.
«Mysaly, RF-nyń 7 myńnan astam azamaty bizdiń elge kelse, 11 myńǵa jýyǵy ketip qalǵan. Kelgender ketip jatyr. Barlyq másele mıgrasııalyq baqylaýda. Shekaradan ótý kezinde eki taraptan da eshqandaı kedergi joq», dedi mınıstr.
Sıfrlyq damý mınıstri Baǵdat Mýsınniń aıtýynsha, 21 qyrkúıekten qazirge deıin 70 myńǵa jýyq reseılik JSN alǵan.
«Jeke sáıkestendirý nómiri rezıdent emesterge bank kartasyn alý úshin ǵana emes, sonymen qatar buzýshylyqtardy tirkeý úshin de beriledi. Biz úshin el retinde olardyń qandaı da bir zań buzý áreketterin, kelýin, tirkelýin baqylap otyrý mańyzdy. Sondyqtan da JSN berilip jatyr. Iаǵnı biz olardy qadaǵalaı alýymyz úshin nómir barlyq derekter qorynda tirkeledi», dep túsindirdi mınıstr.