2022 jyldyń basynan beri kámeletke tolmaǵandardyń qatysýymen bolǵan jol-kólik oqıǵalarynyń kórsetkishi ósken. Bul týraly QR IIM Ákimshilik polısııa komıteti tóraǵasynyń orynbasary Jandos Muratalıev aıtty, dep habarlaıdy Egemen.kz.
«Balalar jol qozǵalysyna qatysýshylardyń eń osal sanattarynyń biri. Ádette, balalar óte aýyr jaraqat alady. Balalardyń jol erejesin bilmeýi nemese olardy elemeý saldary jol apatynyń sebebi bolyp otyr», dedi J.Muratalıev.
Baıandamashy bıylǵy toǵyz aıda kámeletke tolmaǵandardyń qatysýymen bolǵan jol-kólik oqıǵalarynyń kórsetkishi óskenin aıtty. Máselen, balalardyń qatysýymen 2378 jol-kólik oqıǵasy tirkeldi, onda 181 bala qaza taýyp, 2826 bala jaraqat aldy.
Jandos Muratalıev mysal retinde bıylǵy jyldyń 13 qazanynda Almaty oblysynda oryn alǵan jol-kólik oqıǵasyn keltirdi.
«Júrgizýshi «Almaty-Kókpek-Kóktal» tas jolynda «Mersedes» kóligin basqaryp kele jatyp, qarsy jolaqqa shyǵyp ketip, «Sýbarý Legası» kóligimen janama soqtyǵysty. Sosyn jol jıeginen shyǵyp kele jatyp, kedergige soǵylyp, nátıjesinde alty adam oqıǵa ornynda qaza tapty, olardyń tórteýi kámeletke tolmaǵandar edi», dedi Jandos Muratalıev.