20 qazan – ataǵy alysqa taraǵan Anatolıı Hrapatyıdyń týǵan kúni. Sporttaǵy bıik belesterdiń barlyǵyn baǵyndyrǵan dańqty aýyr atlet qapııada qaza tappaǵanda, qazirgi kezde asqaraly 60 jyldyq mereıtoıyn atap óter edik. Alaıda 2008 jyldyń 11 tamyzynda sum ajal abzal azamatty aramyzdan julyp áketti. Ol nebári 44 jyl ǵumyr keshti.
Áıgili sportshy 1962 jyly Aqmola oblysynyń Atbasar aýdanynda dúnıege keldi. Ol bala kezinde kóp qıyndyq kórdi. Ret-retimen baıandasaq, Tolık tórt jasqa tolǵanda anasy sal aýrýyna dýshar boldy. Al ákesi shıtteı balalaryn tastap, basqa jaqqa kóship ketti. Sol kezde úı sharýasynyń bar aýyrtpalyǵy Anatolıı men aǵasy Andreıdiń ıyǵyna tústi. Taǵdyr taýqymetin molynan tartqan balalar erte eseıdi. Hrapatyılar otbasy aýdan ortalyǵyna qonys aýdarǵannan keıin talapshyl jetkinshektiń sporttyń soqpaǵyna túsýine múmkindik týdy. 14 jastan asqan shaǵynda Atbasar qalasyndaǵy aýyr atletıka úıirmesiniń tabaldyryǵyn attaǵan Tolık sporttyq karerasyn aıaqtaǵanǵa deıin bilikti bapker Aleksandr Sıdorovtyń qol astynda jattyqty.
Sporttaǵy alǵashqy qadamdary jaıynda kezinde keıipkerimizdiń ózi bylaı dep áńgimelegen edi: «Sol kezderi Kanadanyń Monreal qalasynda jazǵy Olımpııa oıyndary ótip jatty. Bul 1976 jyl edi. Dál sol ýaqytta men sportqa qumarta bastadym. Birde úıge kelip, teledıdardy qossam, aýyr atletterdiń básekesin kórsetip jatyr eken. Maǵan Davıd Rıgerttiń óneri qatty unady. Tulǵasy kelisken jigit ózi tapsyrys bergen batpan temirdi yrqyna ońaı kóndirip, Olımpıada chempıony atandy. Ýaqyt oza bul jigittiń bizdiń jerlesimiz, irgedegi Kókshetaý óńiriniń týmasy ekenin bildim. Eseıe kele Rıgert Kýbanǵa, odan keıin Rostov oblysyna qonys aýdarypty. Men sol sańlaqqa eliktep óstim».
Asqan daryn ıesi araǵa jyldar salyp, jer-jahandaǵy eń úzdik ziltemirshilerdiń birine aınaldy. Sekseninshi jyldary oǵan kúlli KSRO-da teń keler eshkim tabylmady. Hrapatyı 1985-1990 jyldary qatarynan bes ret álem jáne bes ret Eýropa chempıony atandy. Sol jarystarda san márte dúnıejúzilik rekordtardy jańartyp, mıllıondaǵan jankúıerdiń ystyq yqylasyna bólendi. 1988 jyly Seýlde alaýy tutanǵan Olımpııa oıyndarynda 90 kıloda synǵa túsken qazaqstandyq sportshy aldyna jan salmaı, bas júldeni oljalady. Qossaıystyń qorytyndysy boıynsha ol 412,5 (187,5+225) kılolyq ziltemirdi eńserdi. Sondaǵy Anatolııdiń myqtylyǵyn aıtsańyzshy, Seýldegi basty básekelesi ári komandalyq áriptesi Naıl Mýhamedıarovtyń ózine bas kótertpedi. Atalǵan jarysta jerlesimiz О́zbekstannyń týmasynan baqandaı 12,5 kılo artyq kóterdi. Dál sol mejege kelip toqtaǵan polshalyq Slavomır Zavada qola medaldy qanaǵat tutty.
1992 jyly Anatolıı Hrapatyı TMD quramasy sapynda Barselona Olımpıadasynda kúsh synasýǵa tıis edi. Alaıda bapkerlerdiń tańdaýy 23 jastaǵy Kahı Kahıashvılıge tústi. Grýzııanyń alyby Pıreneı túbegi saparynan altyn medalmen oraldy. Biraq, shyntýaıtyna kelsek, sol dodada Hrapatyı óner kórsetkende, onyń aldyna eshkim túse almaıtyny anyq edi. Ony bapkerler de, basqalar da moıyndaıdy. Biraq otandasymyzǵa ondaı múmkindik berilmedi. Al Barselonaǵa bara almaǵandyǵynyń sebebin Anatolıı ózi «Toqsanynshy jyldardyń basynda KSRO, odan keıin TMD quramasynyń tizginin ustaǵan Vasılıı Alekseevpen qarym-qatynasymyz asa jaqsy bolmady. Kezinde ol Olımpııa oıyndaryn eki márte jáne álem men Eýropa chempıonattaryn segiz retten utqan. Áıgili sportshy jattyqtyrýshylyq qyzmetke kelgennen keıin ataq-dańqy jaǵynan keleshekte ózinen asyp túsedi-aý degen aýyr atletterge qyryn qaraı bastady. Maǵan jáne men sekildi dańqy dúrkirep turǵan sańlaqtarǵa jıi shúıligip, barlyǵymyzdy birqatar mańyzdy jarystan shettetti. Sol Alekseevtiń kesirinen men Barselona Olımpıadasyna qatysa almadym», dep túsindirdi.
Keńes odaǵy ydyraǵannan keıin Hrapatyı táýelsiz Qazaqstannyń týy astynda óner kórsetip, eleýli tabystarǵa jol jetkizdi. Atap aıtsaq, 1993 pen 1995 jyldary Melbýrn men Gýanchjoýda ótken álem chempıonattarynda qola medal ıelendi. 1994 pen 1998 jyldary Hırosıma men Bangkokta alaýy tutanǵan Azııa oıyndarynda kúmispen kúpteldi. Al 1996 jyly Atlanta Olımpıadasynda ol kúmis medal jeńip aldy. Ǵasyrlar toǵysynda úlken sporttan qol úzgennen keıin de Anatolıı aýyr atletıkadan alystaǵan joq. Birer jyl Qazaqstan ulttyq quramasynyń bas bapkeri bolsa, keıinnen Armııashylardyń Ortalyq sport klýbynda jattyqtyrýshylyq qyzmet atqardy.
2008 jyldyń 11 tamyzynda Astananyń irgesindegi Arshaly aýylynyń mańynda Anatolıı Hrapatyı tizgindegen motosıkl qarsy baǵytqa shyǵyp ketken «Toıota» kóligimen soqtyǵysyp, dańqty sportshy sol jerde jantásilim etti.