Prezıdenttiń Qonaev qalasyna jasaǵan jumys saparynda qoǵam kútken máseleler sóz bolǵan eken, óte durys. Al ózim oıda júrgen birer saýaldyń jaýabyn tapqandaımyn.
Mysaly, men tirkeý boıynsha Almaty oblysy, Qarasaı aýdanynyń turǵynymyn. Bizdiń «Asyl arman» turǵyn úı kesheninde 20 myńnyń ústinde turǵyn bar. Biraq qoldanysqa berilgenine 7 jyldan assa da, áli kúnge aýmaqqa mektep salynǵan joq. Ony «áne salady, mine salady» dep sozyp kele jatqanyna qansha jyl boldy. Amalsyz balalar irgedegi Irgelige, Kemertoǵanǵa, Abaı aýylyna baryp oqıdy. Osy saparynda Prezıdent Toqaev «Almaty oblysynda úsh aýysymmen oqytatyn mektep máselesi áli sheshimin tappaı keledi. Aımaqta osyndaı 52 mektep bar. Nebári 30 myń oqýshyǵa eseptelgen mektepterde 90 myńǵa jýyq bala oqyp jatyr. Bul máseleni shuǵyl sheshý qajet», dedi. Toqaev aıtyp otyrǵandaı, aımaqta shynynda mektepterde oqýshy sany 3 ese kóp. Prezıdent «Jaıly mektep» ulttyq jobasymen oblysta 39 mektep salynatynyn atap ótti. Sonyń bireýi bizdiń «Asyl armanǵa» salynsa, qýanar edik.
«Asyl arman» shaǵyn aýdanyna Súleımen Demırel ýnıversıteti jaqyn. Kezinde osy oqý ornyn Qaskeleńge kim salsa da, durys istepti. Stýdentter qalaǵa qatynap sharshamaıdy. Qalanyń syrty, saf aýa, oqýǵa da barlyq jaǵdaı jasalǵan. Prezıdent sózinde mınıstr Saıasat Nurbekke qarata «Quzyrly mınıstrlik Qonaev qalasynda Almatydaǵy joǵary oqý oryndary men kolledjderdiń bólimshesin ashý máselesin qarastyrýy kerek. Sondaı-aq jańa zamanaýı ýnıversıtet ashý isin oılastyrýy qajet» dep tapsyrdy. Mınıstr Qonaevqa SDÝ sekildi myqty ýnıversıtet salyp, qalany ǵylym-bilim ortalyǵyna aınaldyra alsa, naǵyz azamat der edik. Kóldiń jaǵasynda kelisti ýnıversıtet tursa, keremet emes pe?!
Aıtpaqshy, Prezıdenttiń qazaq tili jaıly aıtqan sózi de durys boldy. О́tkende Reseıge barǵanda kótergen usynysyna qazaq qoǵamy narazy bolyp edi. Endi búgin «Eń aldymen, jastarymyz ana tilin – qazaq tilin bilýi kerek. Ana tilimiz birinshi orynda bolyp, bárimiz úshin negizgi basymdyq bolýy qajet. Solaı bolady dep atap aıtqym keledi», dep sendirdi. Biz de solaı bolady dep sengimiz keledi. Solaı bolýy tıis nárse ǵoı!
Serikbol HASAN,
aqyn, Qazaqstan jazýshylar odaǵynyń múshesi